لاہور، 20جنوری(اے پی پی): وزیر اعلیٰ پنجاب محسن نقوی نے کہا ہے کہ تمام جماعتوں کے اور آزاد امیدواروں کوآزادانہ انتخابی سرگرمیوں کی اجازت ہوگی۔ فری اینڈ فیئر الیکشن کا انعقاد ہر صورت یقینی بنایاجائے گا۔الیکشن کمیشن کے ضابطہ اخلاق کی روشنی میں تمام امیدواروں کوجلسہ کرنے، ڈورٹو ڈور مہم چلانے اوربینرزو پوسٹر لگانے کی اجازت ہوگی۔ تمام جماعتوں کو یکساں لیول پلینگ فیلڈ فراہم کی جائے گی۔
ان خیالات کا اظہار انہوں نے ہفتہ کو یہاں صوبائی کابینہ کے 36ویں اجلاس کی صدارت کرتے ہوئے کیا۔وزیر اعلیٰ محسن نقوی نے کابینہ اجلاس سے خطاب کرتے ہوئے کہا کہ پاک فوج یااداروں کے خلاف تقریر پرضرور کارروائی ہو گی۔فری اینڈ فیئر الیکشن میری ذمہ داری ہے جسے میں ہر صورت پر پوری کروں گا۔ عام انتخابات کا پرامن اور آزادانہ ماحول میں انعقاد یقینی بنانے کے لئے الیکشن کمیشن کے ساتھ پورا تعاون کریں گے۔
کابینہ کے اجلاس میں عام انتخابات کے فول پروف انتظامات اور سکیورٹی کیلئے4ارب 10کروڑروپے کے فنڈز کے اجراء کی منظوری دی گئی۔ اجلاس میں مناواں لاہور میں پنجاب کینسر کیئر ہسپتال کے قیام کے لئے 8ارب روپے کے فنڈز کی منظوری دی۔
اجلاس میں صحت سہولت پروگرام کے تحت مریضوں کے علاج معالجے کے لئے نئے اقدامات کی منظوری دی گئی۔اجلاس کے دوران وزیر اعلیٰ محسن نقوی نے بڑے ہسپتالوں میں لیب ٹیسٹ کی فیس بڑھانے کی تجویزپر عملدرآمدروک دیا۔اجلاس میں اکبر چوک فلائی اوور پراجیکٹ کے اضافی کاموں کو جلد مکمل کرنے کے لئے اضافی فنڈز کی منظوری دی گئی۔
اجلاس میں لاہور کی مختلف شاہراؤں پر ٹریفک کو بہتر بنانے کے لئے چوکنگ پوائنٹس کی ری ماڈلنگ کا فیصلہ کیا گیا۔ چوکنگ پوائنٹس کی ری ماڈلنگ کے کام 700 ملین روپے کی لاگت سے مکمل کیے جائیں گے۔ اجلاس میں کابینہ سٹینڈنگ کمیٹی فنانس اینڈ ڈویلپمنٹ کے 16ویں اجلاس کے فیصلوں کی توثیق کی گئی۔
اجلاس میں صوبائی وزراء، مشیران، چیف سیکرٹری، انسپکٹر جنرل پولیس، ایڈووکیٹ جنرل پنجاب، متعلقہ محکموں کے سیکرٹریز اور اعلیٰ حکام نے شرکت کی۔
