اسلام آباد، جنوری 20 ( اے پی پی): سیکرٹری خارجہ سائرس سجاد قاضی اور چین کے نائب وزیر خارجہ سن ویڈونگ نے آج وزارت خارجہ کی لائبریری میں سی پیک کارنر کا افتتاح کیا۔
اس موقع پر چینی نائب وزیر خارجہ نے کہا کہ آہنی برادر اور قابل اعتماد دوست کی حیثیت سے چین اپنی خارجہ پالیسی میں پاکستان کو خصوصی اہمیت دیتا ہے اور دونوں ممالک کے درمیان اسٹریٹجک تعلقات کو مزید مضبوط بنانے کا خواہاں ہے۔
چین کے بنیادی مسائل پر پاکستان کی حمایت کا شکریہ ادا کرتے ہوئے نائب وزیر خارجہ سن ویڈونگ نے پاکستان کی خودمختاری ، علاقائی سالمیت اور پاکستان کی اقتصادی ترقی، ترقی اور خوشحالی کے لیے چین کی حمایت کا اعادہ کیا۔
پاکستان میں نائب وزیر خارجہ سن ویڈونگ کا خیرمقدم کرتے ہوئے سیکرٹری خارجہ نے کہا کہ پاک چین دوستی کو پاکستان میں مکمل سیاسی، ادارہ جاتی اور عوامی حمایت حاصل ہے۔ علاقائی امن اور استحکام کے لیے دوطرفہ دوستی کی اہمیت پر زور دیتے ہوئے انہوں دوطرفہ تعلقات کو مزید وسعت دینے اور مضبوط کرنے کا اظہار کیا۔
