لاہور،20جنوری(اے پی پی):وزیراعلی پنجاب محسن نقوی نے صوبائی کابینہ کے ہمراہ رات گئے میو اورگنگارام ہسپتالوں کے دورے کیے۔وزیراعلی ،صوبائی وزراء اوراعلی افسران نے کوچ میں سفر کیا اوردونوں ہسپتالوں میں جاری اپ گریڈیشن کے کاموں کا جائزہ لیا۔ میوہسپتال کا سٹیٹ آف دی آرٹ ایمرجنسی بلاک تکمیل کے قریب،سٹیٹ آف دی آرٹ آپریشن تھیٹر ز میں جدید سہولتیں اوردرجہ حرارت کوکنٹرول کرنے کیلئے ڈیجیٹل پینل نصب کیے گئے ہیں۔
وزیر اعلی محسن نقوی نے صوبائی وزراء کے ہمراہ اپ گریڈیشن کے کاموں کی فنشنگ کامعائنہ کیا، ایمرجنسی بلاک کے استقبالیہ کائونٹر،فرشوں کی ٹائلز اورمریضوں وتیمارداروں کے لئے سائن بورڈز دیکھے ۔انہوں نے استقبالیہ میں اردوزبان میں لگائے سائن بورڈز پر تحریرکو بہتر کرنے کی ہدایت کی تاکہ مریضوں اور تیماداروں کو پڑھنے میں آسانی ہو۔
وزیراعلی نے آپریشن تھیٹرزکا بھی معائنہ کیااورآپریشن تھیٹرز میں نصب جدید لائٹس کا جائزہ لیا۔ محسن نقوی نے گرائونڈ فلور، فرسٹ فلور، سیکنڈ فلوراورتھرڈفلور پر جاری تعمیراتی سرگرمیوں کامشاہدہ کیا اورکہا کہ میوہسپتال کے ایمرجنسی بلاک کو آئندہ چند روز میں کھول دیاجائے گا۔ سیکرٹری تعمیرات و مواصلات نے اپ گریڈیشن پراجیکٹ پر ہونے والی پیشرفت کے بارے بریفنگ دی۔
میو ہسپتال کے بعد وزیراعلی محسن نقوی کابینہ کے ہمراہ کوچ میں گنگارام ہسپتال پہنچے۔ وزیراعلی اورصوبائی وزراء نے اپ گریڈیشن کے کاموں کا تفصیلی جائزہ لیا اور وارڈز، آپریشن تھیٹرز و دیگر شعبوں میں کام پر پیش رفت کا مشاہدہ کیا۔وزیراعلی نے تعمیراتی سرگرمیوں کا معائنہ کیا ، ہسپتال کے اندر سے گزرنے والے سیوریج لائن کوشفٹ کرنے کا فوری پلان تیار کرنے کا حکم دیتے ہوئے کہا کہ سیوریج لائن کے حوالے سے جامع اورپائیدار حل تلاش کیا جائے۔
وزیراعلی محسن نقوی نے رات گئے کام کرنے والے مزدوروں سے مصافحہ کیا اورانہیں شاباش دی۔ وزیر اعلی نے ہدایت کی کہ گنگارام ہسپتال کے تعمیراتی کاموں کو تیز اوراضافی لیبر فورس لگائی جائے ، اپ گریڈیشن کے کاموں میں معیار کو ہر قیمت پر یقینی بنایا جائے۔
چیئرمین پلاننگ اینڈ ڈویلپمنٹ بورڈ،سینئر ممبر بورڈ آف ریونیو، سیکرٹریز،سی سی پی او،کمشنر، وائس چانسلر کنگ ایڈورڈ میڈیکل یونیورسٹی، چیف ایگزیکٹو آفیسر میو ہسپتال، ایم ایس میو ہسپتال،وائس چانسلر فاطمہ جناح میڈیکل یونیورسٹی، ایم ایس گنگا رام ہسپتال اور دیگر حکام بھی اس موقع پر موجود تھے۔
