لاہور،22جنوری( اے پی پی ): نگران وزیراعلیٰ پنجاب محسن نقوی سے امریکی قونصل جنرل کرسٹن کے ہاکنزنے ملاقات کی۔امریکی قونصل جنرل کرسٹن ہاکنزنے نگران وزیراعلیٰ محسن نقوی کے عوام دوست اقدامات کوسراہا اور کہا کہ محسن نقوی انتہائی متحرک اورمحنتی وزیراعلیٰ ہیں،ہر کوئی ان کے کام کی تعریف کرتا ہے۔
وزیراعلیٰ محسن نقوی کی قیادت میں نگران حکومت نے عوام کی خدمت کا حق ادا کیا ہے۔ جب بھی دیکھیں محسن نقوی کام کررہے ہوتے ہیں۔ اس موقع پر گفتگو کرتے ہوئے نگران وزیراعلیٰ محسن نقوی نے کہا کہ زراعت خصوصاً گندم کی پیداوار میں اضافے کیلئے امریکی مہارت سے فائدہ اٹھانا چاہتے ہیں ،کیلیفورنیا یونیورسٹی سے پنجاب کے تعلیمی اداروں کے الحاق کیلئے کوشاں ہیں،کیلیفورنیا کی طرز پر پنجاب میں چھوٹے گھروں کی تعمیر کے منصوبے پر کام کرنا چاہتے ہیں۔
محسن نقوی نے کہا کہ سموگ بڑا چیلنج ہے،وجوہات کا تعین بہت ضروری ہے مختصر عرصے میں پوری کوشش کی کہ عوام کی خدمت کرسکیں۔ صوبائی وزراء ایس ایم تنویر،عامر میر، چیئرمین پلاننگ اینڈ ڈویلپمنٹ بورڈاورمتعلقہ حکام بھی اس موقع پر موجود تھے۔
