اسلام آباد،23 جنوری (اے پی پی ): چیئرمین سینیٹ محمد صادق سنجرانی نے اسلام آباد میں ہائر ایجوکیشن کمیشن (ایچ ای سی) کے زیر اہتمام “Youth – Pivot of National Integration” کے عنوان سے منعقدہ کنونشن سے خطاب کرتے ہوئے کہا ہے کہ پاکستان ایک عظیم ملک ہے۔ہمیں پاکستان کو عطا کردہ اللہ تعالیٰ کی نعمتوں پر شکر ادا کرنا چاہیے۔ پاکستانی ایک ہنرمند اور محنتی قوم ہے۔ بہت سے ممالک کے پاس زیادہ وسائل ہیں لیکن ان کے پاس پاکستان جیسے انسانی سرمائے کی کمی ہے،نوجوان تندہی سے کام کریں، محنت کا صلہ لازمی ملے گا۔
چیئرمین سینیٹ نے بلوچستان میں یونیورسٹیوں کے قیام پر ایچ ای سی کی کاوشوں کی تعریف کی اور کہا کہ بلوچستان کے لوگ بھی اب تعلیم یافتہ ہیں، تعلیم کے زیور سے آراستہ لوگوں میں مثبت تبدیلی آئی ہے۔ پاکستان کے سب سے بڑے ضلع چاغی میں روڈ انفراسٹرکچر، بجلی کی فراہمی اور یونیورسٹی قائم کی گئی ہے۔
چیئرمین سینیٹ محمد صادق سنجرانی نے قومی ترقی کو آگے بڑھانے میں مضبوط اداروں اور قابل اساتذہ کی اہمیت پر زور دیتے ہوئے کہا کہ ہمیں آپس میں بھی مایوسی اور ناامیدی کو فروغ نہیں دینا چاہیے۔ اللہ تعالیٰ نے پاکستان کو بے شمار وسائل سے نوازا ہے، نوجوان ملک کی ترقی میں بڑھ چڑھ کر حصہ لیں، قومی اتحاد کو فروغ دینے میں نوجوانوں کا اہم کردار ہے اور ہر فرد حکومتی نظام کا ایک حصہ ہے،اس کی ترقی ہماری اجتماعی ذمہ داری ہے۔
انہوں نے کہا کہ ملک کو درپیش چیلنجز پر قابو پانے کے لیے اتحاد کی ضرورت ہے۔ ایچ ای سی، گوادر،کوئٹہ بلوچستان میں بھی اسی طرح کے یوتھ کنونشن کا انعقاد کرے تعاون کیلئے تیار ہیں۔
