لاہور،24جنوری (اے پی پی):نگران وزیر اعلیٰ محسن نقوی کی زیر صدارت بدھ کو پنجاب کابینہ کا 37 واں اجلاس منعقد ہوا۔کابینہ اجلاس میں ڈیرہ غازی خان انسٹی ٹیوٹ آف کارڈیالوجی کے ڈاکٹرز کے لئے خصوصی الا ونس کی منظوری دی گئی۔کابینہ نے بینک آف پنجاب کا بورڈ آف ڈائریکٹرز تحلیل کرنے کی منظوری دی۔
اجلاس میں مزار بی بی پاکدامن کے راستے کو کشادہ کرنے کے لئے فنڈز کے اجرا کی منظوری دی گئی۔کابینہ نے فیصلہ کیا کہ سابق چیف سیکرٹری پنجاب عبداللہ سنبل مرحوم کی بیوہ کو جی او آر ون میں الاٹ کیے گئے گھر کا فوری قبضہ دیا جائے گا۔
اجلاس میں پنجاب ہیلتھ کیئر کمیشن (ترمیمی) آرڈیننس 2023 کے دوبارہ اجرا کی منظوری دی گئی۔کابینہ نے پنجاب لیبر کورٹ ساہیوال اور فیصل آباد میں پریزائیڈنگ آفیسرز کے عہدوں پر تقرری کی منظوری دی۔اجلاس میں ڈسٹرکٹ کنزیومر کورٹ لاہور میں پریزائیڈنگ آفیسر کے عہدے پر نامزد گی اور پنجاب وائلڈ لائف مینجمنٹ کمیٹی کی تشکیل کی منظوری دی گئی۔کابینہ نے پنجاب ڈیلیگیشن آف فنانشل پاورز رولز 2016 میں ترامیم کی منظوری دی۔
صوبائی وزرا، مشیران،چیف سیکرٹری، انسپکٹرجنرل پولیس، ایڈووکیٹ جنرل پنجاب اور متعلقہ محکموں کے سیکرٹریز نے اجلاس میں شرکت کی۔
