اسلام آباد،25جنوری (اے پی پی):خصوصی سرمایہ کاری کی سہولت کونسل کی 8ویں ایگزیکٹو کمیٹی کا دوسرا سیشن جمعرات کو وزیر برائے منصوبہ بندی، ترقی اور خصوصی اقدامات محمد سمیع سعید کی زیرِ صدارت منعقد ہوا۔ اجلاس میں باقی وزارتوں کے ایجنڈا پوائنس پر غور کیا گیا۔
اجلاس میں متعلقہ وفاقی و صوبائی وزراء اور اعلیٰ سطحی سرکاری حکام نے بھی شرکت کی ۔متعلقہ وزارتوں نے خصوصی سرمایہ کاری سہولت (ایس آئی ایف سی) کے تحت سیکٹورل پراجیکٹس اور پالیسی سطح کےاقدامات پر پیشرفت پیش کی اور مستقبل کی کاوشوں کو آگے بڑھانے کے لیے تفصیلی لائحہ عمل پیش کیا گیا۔
کمیٹی نے سرمایہ کاروں کے اعتماد کو بڑھانے کیلئے تنازعات کے حل کے فریم ورک کو مضبوط بنانے کے لیے جاری کوششوں کا جائزہ لیا جو ایک اہم پالیسی سطح کا اقدام ہے۔ کمیٹی نے انسانی وسائل کی ترقی اور میگا انفراسٹرکچر پراجیکٹس میں سرمایہ کاری کی کوششوں کا بھی جائزہ لیا۔کمیٹی نے مختلف سٹیک ہولڈرز کو ہدایت کی کہ وہ بین الاقوامی معیارکے مطابق بہتررابطہ سازی، ضروری سروسز اور اچھی تربیت یافتہ لیبر فورس کے ذریعے سرمایہ کاروں کو سازگار ماحول فراہم کرنے کے لیے مختلف اقدامات کو تیز کریں ۔
کمیٹی نے مختلف شعبوں کے پہلوئوں پر اتفاق رائے پیدا کرنے کے لیے مکمل بحث کی اور سرمایہ کاری کے ماحول کو مزید بہتر بنانے کے لیے مختلف پالیسی سطح کے اقدامات کی سفارش کی۔
