لاہور،25جنوری ( اے پی پی): نگران وزیر اعلیٰ پنجاب کی ہدایت پر شہر میں جاری ترقیاتی منصوبوں کی دن رات مانیٹرنگ جاری، صوبائی وزیر ہاؤسنگ بیرسٹر اظفر علی ناصر نے بند روڈ پیکیج ون اور ٹو کا تفصیلی دورہ کیا اور ترقیاتی کاموں کا جائزہ لیا۔جاری ترقیاتی کاموں کے بارے صوبائی وزیر کو بریفنگ دی گئی اور بتایا گیا کہ بند روڈ پیکیج ٹو سگیاں تا بابو سابو کا تقریباً 60 فیصد کام مکمل کر لیا گیا، پیکج ون نیازی چوک تا سگیاں کا تقریباً 75 فیصد کام مکمل کر لیا گیا۔پیکیج ون کے تمام سب ویز مکمل کر لئے گئے۔
نگران صوبائی وزیر ہاؤسنگ اظفر علی ناصر نے اس موقع پر گفتگو کرتے ہوئے کہا کہ بند روڈ پیکیج ون اور ٹو پر دن رات کام جاری ہے۔ پیکج ون اور ٹو کے کام کو ٹارگٹ کے مطابق ہر صورت مکمل کیا جائے ،منصوبے کو وزیر اعلیٰ پنجاب کی دی گئی ڈیڈ لائن پر مکمل کیا جائے۔
