کوئٹہ،27 جنوری،(اے پی پی) نگران وزیراعلیٰ بلوچستان میر علی مردان خان ڈومکی کی زیر صدارت بلوچستان اپیکس کمیٹی کا پندرہواں اجلاس چیف منسٹر سیکرٹریٹ میں منعقد ہوا جس میں کمانڈر 12 کور لیفٹیننٹ جنرل راحت نسیم احمد خان، نگران وزیر داخلہ میر زبیر خان جمالی چیف سیکرٹری بلوچستان شکیل قادر خان سمیت اعلیٰ صوبائی سول و عسکری حکام اور ڈویژنل کمشنرز نے شرکت کی ۔
اجلاس میں امن و امان کی مجموعی صورتحال کے علاوہ صاف شفاف اور غیر جانبدارانہ انتخابات کے انعقاد کے لئے اقدامات کا جائزہ لیا گیا اجلاس سے خطاب کرتے ہوئے نگراں وزیراعلیٰ بلوچستان میر علی مردان خان ڈومکی نے کہا کہ صوبے میں پرامن انتخابات کے انعقاد کے لئے انتظامی حکمت عملی مرتب کرلی گئی ہے الیکشن کے دوران حساس مقامات پر بحالی امن کے لئے پولیس اور لیویز کی معاونت کے لئے پاک فوج اور ایف سی کے جوان بھی موجود ہوں گے 28 پولنگ اسٹیشنوں پر انتخابی سامان کی ترسیل روڈ کے ذریعے جبکہ8 پولنگ اسٹیشنوں پر ہیلی کاپٹرز کے ذریعے ہوگی حساس پولنگ اسٹیشنوں پر سی سی ٹی وی کیمروں کی تنصیب جاری ہے ۔
نگران وزیراعلیٰ بلوچستان نے اجلاس کو بتایا کہ الیکشن کے انتظامات کے لئے صوبے کے ڈپٹی کمشنرز اورپولیس کو مطلوبہ فنڈز کا اجراءکردیا گیا ہے، صوبے میں صاف شفاف اور غیر جانبدارانہ انتخابات کے انعقاد کے لئے پرعزم ہیں عوام بلا خوف و خطر اپنا حق رائے دہی استعمال کریں، مکمل تحفظ فراہم کریں گے انتخابات سے قبل پولنگ کے روز اور بعد از الیکشن عوام کے جان و مال کے تحفظ کے لئے سیکورٹی کے موثر اقدامات اٹھائے گئے ہیں عوام مطمئن رہیں اور پوری یکسوئی اور ذہنی سکون کے ساتھ اپنے جمہوری فریضے کی ادائیگی کریں۔ اجلاس میں ایڈیشنل چیف سیکرٹری داخلہ بلوچستان زاہد سلیم نے اپیکس کمیٹی کے شرکاءکو صوبائی حکومت کی جانب سے اٹھائے گئے اقدامات سے متعلق تفصیلی بریفنگ دی ۔ انہوں نے کہا کہ صوبائی حکومت پرامن انتخابات کے انعقاد کے لئے پرعزم اور پوری طرح سے تیار ہے۔
