لاہور،29 جنوری ( اے پی پی ):آئی جی پنجاب ڈاکٹر عثمان انور نے کہا ہے کہ پنجاب پولیس شہروں کو آئی ٹی ٹیکنالوجی بیسڈ مانیٹرنگ سسٹم سے محفوظ بنانے کیلئے مقامی وسائل پر انحصار کر رہی ہے،پائیدار، معیاری اور کم لاگت سی سی ٹی کیمرہ سسٹم سے غیر ملکی کمپنیوں کی اجارہ داری اور تاخیری حربوں سے نجات ملے گی ۔
ان خیالات کا اظہار انہوں نے پنجاب سیف سٹیز اتھارٹی ہیڈ کوارٹرز اہم اجلاس کی صدارت کرتے ہوئے کیا۔آئی جی پنجاب نے راولپنڈی، فیصل آباد، گوجرانوالہ سمیت 21 شہروں میں سیف سٹی کیمروں کی تنصیب کے حوالے سے انتظامات کا جائزہ لیا اور کہا کہ پنجاب انفارمیشن ٹیکنالوجی بورڈ کے تعاون سے شہروں کی سیف سٹی اتھارٹی مانیٹرنگ سسٹم پر منتقلی جلد از جلد یقینی بنائی جائے۔
آئی جی پنجاب نے لاہور سمیت پنجاب بھر میں پولنگ سٹیشنز پر سی سی ٹی وی کیمروں کی تنصیب کے پلان کا جائزہ بھی لیا اور کہا کہ لاہور سمیت مختلف اضلاع میں حساس پولنگ اسٹیشنز پر 23 ہزار کیمرے نصب کئے جائیں گے،سیف سٹیز اتھارٹی اور پی آئی ٹی بی مشترکہ طور پر کیمروں کی تنصیب کا کام کرے گی۔
انہوں نے کہا کہ ہر ضلع میں انتہائی حساس پولنگ سٹیشن پر 04 کیمرے نصب کیےجائیں گے، بیرونی حصہ کور کرنے کیلئے ایک کیمرہ،پولنگ اسٹیشنز کے اندر 03 کیمرے نصب کیےجائیں گے۔
اجلاس میں الیکشن سکیورٹی انتظامات کی ڈیجیٹل مانیٹرنگ اور دیگر پیشہ ورانہ انتظامات کا جائزہ لیا گیا۔ایم ڈی پنجاب سیف سٹیز اتھارٹی احسن یونس، چیف آپریٹنگ آفیسر کیپٹن ریٹائرڈ مستنصر فیروز،ایس ایس پی آپریشن کمانڈر رفعت بخاری، چیف ایڈمنسڑیشن آفیسر رانا شعیب محمود سمیت دیگر افسران نے اجلاس میں شرکت کی۔
