اسلام آباد، 01فروری (اے پی پی): وفاقی وزیر برائے مذہبی امور انیق احمد نے کہا کہ اب پاکستانی عازمینِ حج سعودی ویزہ بائیو ایپ کی مدد سے گھر بیٹھے بائیو میٹرک کر سکیں گے۔
ان خیالات کا اظہار انہوں نے جمعرات کو پاکستان میں تعینات سعودی سفیر نواف سعید المالکی سے ملاقات میں کیا۔ ملاقات میں دونوں رہنماؤں کے درمیان آئندہ حج انتظامات کو حتمی شکل دینے کے حوالے سے کئی نکات زیر بحث آئے۔
اس موقع پر بات کرتے ہوئے وزیر مذہبی امور انیق احمد نے کہا کہ اس سال وقت سے پہلے تمام امور کو بہترین انداز میں مکمل کیا جا رہا ہے۔ وزارت آئندہ ہفتے عازمینِ حج کی جامع تربیت اور بائیو میٹرک شیڈول کا اعلان کرے گی۔
انہوں نے مزید کہا کہ اس سال پاکستانی حجاج کی سہولت کیلئے کئی منفرد اور مثالی اقدامات اٹھائے گئے ہیں اب پاکستانی عازمینِ حج سعودی ویزہ بائیو ایپ کی مدد سے گھر بیٹھے بائیو میٹرک کر سکیں گے۔
سعودی سفیر جناب نواف سعید المالکی نے بہترین خدمات کی فراہمی پر ایوارڈ حاصل کرنے والے پہلے تین ممالک میں پاکستان حج مشن کی شمولیت پر مبارکباد پیش کرتے ہوئے کہا کہ وزیر مذہبی امور انیق احمد کی جانب سے حجاج کو بہترین سہولیات کی فراہمی لائق تحسین ہیں۔ حجاج کرام کو سہولیات اور خدمات کی فراہمی میں پاکستانی وزارتِ مذہبی امور اور حج مشن کا کردار قابلِ تقلید ہے ۔
