لاہور،یکم فروری ( اے پی پی ): لاہور رنگ روڈ سدرن لوپ تھری پراجیکٹ پر کام کی رفتار تیز،رواں ماہ ٹریفک کیلئے کھول دیا جائے گا-نگران وزیراعلیٰ پنجاب محسن نقوی نے لاہور رنگ روڈ سدرن لوپ تھری پراجیکٹ کا دورہ کیا اڈہ پلاٹ سے مراکہ ملتان روڈ تک 15کلومیٹر پورے روٹ پر ہونے والی پیشرفت کا جائزہ لیا۔
وزیر اعلیٰ محسن نقوی نے اڈہ پلاٹ سے ملتان روڈ تک پراجیکٹ پر جاری تعمیراتی سرگرمیوں کا معائنہ کیاسڑک کے بیس کور س اور اسفالٹ کے خود کار مکینیکل عمل کا مشاہدہ کیا۔ محسن نقوی نےعوام کی سہولت کیلئے پراجیکٹ کی جلد تکمیل کی ضرورت پر زور دیا اور کہا کہ ملتان روڈ سے آنے والی ٹریفک کے لئے ایک سائیڈپہلے کھول دی جائے گی منصوبے پر کام کی رفتار تیز کی جائے اور جلد کام کو مکمل کیا جائے۔
انہوں نے کہا کہ یہ منصوبہ لاہور کی ٹریفک کو ریگولیٹ کرنے کیلئے بہت اہمیت رکھتا ہے۔وزیراعلیٰ محسن نقوی نے منصوبے کی جلد تکمیل کیلئے متعلقہ حکام کو ضروری ہدایات دیں ایف ڈبلیو اوکے حکام نے پراجیکٹ پر ہونے والی پیش رفت کے بارے میں بریفنگ دی۔صوبائی وزراء اظفر علی ناصر، بلال افضل، سیکرٹری تعمیرات ومواصلات، کمشنر لاہور،بھی موجود تھے-
