اسلام آباد،28 فروری ( اے پی پی ): سپیکر قومی اسمبلی راجہ پرویز اشرف نے ڈی چوک پر واقع یادگارِ دستور اور باغِ دستور کا افتتاح کیا،اس موقع پر تقریب سے خطاب کرتے ہوئے اسپیکر قومی اسمبلی راجہ پرویز اشرف کا کہنا تھا کہ پارلیمانی کمیٹی کی کاوشوں سے ہم اس قابل ہوئے ہیں کہ ہم اس باغ دستور میں کھڑے ہیں۔
انہوں نے کہا کہ آئین پاکستان ہماری بنیاد ہے۔یادگارِ دستور اور باغِ دستور پاکستان کی تاریخ میں آئین کی اہمیت کو اجاگر کرنے کے حوالے سے اپنی نوعیت کا پہلا منصوبہ ہے۔ شاہراہ جمہوریت پر واقع یادگار اور باغ دستور 1973 کے آئین کی عظمت کی مکمل تصویر پیش کرتے نظر آتے ہیں۔ ایک طرف جہاں یادگار دستور کی بلند پایہ تختیوں پر آئین پاکستان میں منظور کیے گئے بنیادی انسانی حقوق درج ہیں تو دوسری طرف آئین پاکستان کو تشکیل دینے والی آئینی کمیٹی کے نام کندہ کیے گئے ہیں۔یادگار دستور کی دیواروں کے درمیان لہلہاتا سبز ہلالی پرچم قومی یکجہتی کی علامت ہے۔ سرسبز و شاداب باغ دستور میں آئین کے آرٹیکلز کی مناسبت سے درخت بھی لگائے گئے ہیں۔
شاہراہ جمہوریت(ڈی چوک) پر واقع باغ دستور میں ہونے والی تقریب میں اراکین پارلیمان ، آ ئین کی گولڈن جوبلی کے حوالے سے بنائی گئی مشاورتی کمیٹی کے اراکین، سول سوسائٹی اور میڈیا کے نمائندے شرکت کی۔ یاد رہے کہ یہ اقدامات سپیکر راجہ پرویز اشرف کی زیر قیادت آئین کی گولڈن جوبلی کو احسن طریقے سے منانے کے حوالے سے اٹھائے گئے اورمشاورتی کمیٹی کی سفارشات پر عمل میں لائے گئے ہیں۔
