اسلام آباد،29 فروری(اے پی پی): محکمہ موسمیات نے اگلے دو سے تین دنوں کے دوران گوادر، کیچ، تربت، پنجگور، آواران، بارکھان، کوہلو، سبی، نصیر آباد، دالبندین، خضدار اور ڈیرہ غازی خان جبکہ خیبرپختونخوا، کشمیر، مری، گلیات اور اسلام آباد/راولپنڈی میں موسلا دھار بارشوں کی پیشگوئی کی ہے، جس کے باعث برساتی/مقامی ندی نالوں میں طغیانی کا خدشہ بھی ہے۔
01اور02 مارچ کو مری، گلیات، ناران، کاغان، دیر، سوات، کوہستان، مانسہرہ، ایبٹ آباد، شانگلہ، استور، ہنزہ، اسکردو، وادی نیلم، باغ، پونچھ اور حویلی میں شدید بارش اور برفباری سے رابطہ سڑکیں بھی بند ہونے کا خدشہ ہے جبکہ اس دوران بالائی خیبر پختونخوا، مری، گلیات، کشمیر اور گلگت بلتستان میں لینڈسلائیڈنگ بھی ہو سکتی ہے۔
جمعرات کے روز بلوچستان، خیبر پختونخوا ،جنوبی/وسطی پنجاب میں آندھی/جھکڑ چلنےاور گرج چمک کے ساتھ بارش اور پہاڑوں پر برفباری کا امکان ہے اس دوران بلوچستان میں اکثر مقامات پر موسلا دھار بارش/چند مقامات پر ژالہ باری جبکہ شمالی بلوچستان میں شدیدبرفباری جبکہ شام/رات میں بالائی سندھ، کشمیر ،گلگت بلتستان اورخطہ پوٹھو ہار میں آندھی/ جھکڑ چلنےاور گرج چمک کے ساتھ بارش اور پہاڑوں پر برفباری کی توقع ہے۔
گذشتہ 24 گھنٹوں کے دوران ملک کے بیشتر علاقوں میں موسم سرد اور خشک رہا۔ تاہم بلوچستان میں گرج چمک کے ساتھ بارش اور پہاڑوں پر برفباری ہوئی۔
سب سے زیادہ بارش کوئٹہ میں 21، دالبندین 11، نوکنڈی 05، ژوب 04، قلات 02،پنجگور اور تربت میں 01ملی میٹر ریکارڈ ہوئی۔ زیارت میں 01 انچ برفباری بھی ریکارڈ ہوئی۔
آج ریکارڈ کیے گئے کم سے کم درجہ حرارت کے مطابق لہہ میں منفی 08، کالام منفی 06،استور، گوپس، اسکردو منفی03، مالم جبہ اورہنزہ میں منفی02سینٹی گریڈ ریکارڈ کیا گیا۔
