اسلام آباد، 08 مارچ (اے پی پی ):چئیرمین پاکستان کرکٹ بورڈ محسن نقوی کا بڑا فیصلہ،قذافی سٹیڈیم لاہور، نیشنل سٹیڈیم کراچی اور راولپنڈی کرکٹ سٹیڈیم اپ گریڈ ہوں گے۔
چئیرمین پی سی بی کی زیر صدارت اجلاس میں نیسپاک کے حکام نے سٹیڈیمز کی اپ گریڈیشن کے حوالے سے بریفنگ دی جس میں ڈائریکٹر انفراسٹرکچر پی سی بی، نیسپاک کے حکام اور متعلقہ حکام نے شرکت کی۔چئیرمین پی سی بی محسن نقوی نے 3 روز میں قذافی سٹیڈیم کی اپ گریڈیشن کا حتمی ڈیزائن پلان طلب کرلیا، چیمپئنز ٹرافی سے پہلے تینوں سٹیڈیمز کی اپ گریڈیشن مکمل کی جائے گی۔
دوسرے مرحلے میں نیشنل کرکٹ سٹیڈیم کراچی اور راولپنڈی کرکٹ سٹیڈیم کی اپ گریڈیشن کا ڈیزائن پلان تیار کر کے کام کا آغاز کیا جائے گا جس میں سٹیڈیمز میں شائقین کرکٹ کے سہولتوں کو بہتر بنایا جائے گا اور ضرورت کے مطابق سٹیڈیم میں نشستوں کا اضافہ کیا جائے گا۔ قذافی سٹیڈیم کے باکسز میں سہولتوں کو بہتر بنایا جائے گا۔ اپ گریڈیشن کے کام کو معیار اور رفتار کے ساتھ مکمل کرایا جائے گا۔
