لاہور، 13مارچ(اے پی پی): وزیراعلیٰ پنجاب مریم نوازشریف کی زیر صدارت ٹیکنیکل ایجوکیشن اینڈ ووکیشنل ٹریننگ اتھارٹی کا اجلاس منعقد ہوا۔ اجلاس میں ٹیکنیکل ایجوکیشن سے متعلق بریفنگ دی گئی۔ وزیراعلیٰ مریم نوازشریف نے ٹیکنیکل اور ووکیشنل ٹریننگ میں بہتری کے لئے ماسٹر پلان طلب کیا اور ٹیوٹا حکام کو جدید ٹیکنیکل اور ووکیشنل ٹریننگ کے لئے 5سالہ روڈ میپ مرتب کرنے کی ہدایت دی۔ اجلاس میں ٹیوٹا بورڈ کی از سرنو تشکیل کرنے کا فیصلہ کیا اور ٹیوٹا حکام کو انڈسٹری کی ضرورت کے مطابق ٹریننگ کے لئے میپنگ کا حکم بھی دیا۔ مریم نواز شریف نے کہا کہ ہنر مند انسانی وسائل کی ایکسپورٹ کے لئے ڈیمانڈ کا علم ہونا ضروری ہے۔ انہوں نے کہا کہ صنعتی ضروریات کے مطابق ٹریننگ اور کورسز کرائے جائیں۔مریم نوازشریف نے کہا کہ ووکیشنل اور ٹیکنیکل ادارو ں میں اچھے انسٹرکٹر لائے جائیں۔ وزیراعلیٰ پنجاب نے کہا کہ ٹیکنیکل اینڈ ووکیشنل ٹریننگ کے شعبے میں بہتری سے ٹیکنالوجی کا انقلاب برپا ہوسکتا ہے۔ مریم نواز شریف نے کہا کہ ہر انڈسٹریل سیکٹر کی ڈیمانڈ کے مطابق کورس ڈیزائن کئے جائیں گے۔
انہوں نے کہا کہ ٹیوٹا سے فارغ التحصیل ہر گریجوایٹ کو فوراً جاب ملنی چاہیے۔ ٹیوٹا بورڈ میں صنعتکاروں اور نجی سیکٹر کے نمائندوں کو شامل کیاجائے۔ مریم نوازشریف نے کہا کہ ٹیوٹا ادارو ں کی پرانی لیبز کی مارکیٹ کی ڈیمانڈ کے مطابق اپ گریڈیشن کی جائے گی۔ مریم نواز نے کہا کہ ٹیوٹاکے اداروں کوLearn and Earn کے مطابق کام کرنا چاہیے۔مریم نوازشریف نے کہا کہ پنجاب میں میکر و چیپ، اینٹی گریڈڈ سرکٹ سمیت ہائی ٹیک آئی ٹی ٹیکنالوجی ٹریننگ کی ضرورت ہے۔
سینئر صوبائی وزیر مریم اورنگزیب، وزیر صنعت چوہدری شافع حسین، چیف سیکرٹری، چیئرمین پی اینڈ ڈی،سیکرٹری فنانس، سیکرٹری انڈسٹری، چیئرمین ٹیوٹا، سی اواو ٹیوٹا اور دیگر حکام نے اجلاس میں شرکت کی۔
