لاہور،14مارچ(اے پی پی): وزیر اعلیٰ پنجاب مریم نواز شریف نے کہا ہے کہ مزدور وں کو اپنا گھر اور اپنی چھت فراہم کرنا میرا عزم ہے، صوبے بھر میں مرحلہ وار لیبر کالونیاں بنائیں گے۔ قائد اعظم بزنس پارک شیخوپورہ اور راولپنڈی میں لیبر کمپلیکس بنایاجائے گا۔
ان خیالات کا اظہار انہوں نے ایک خصوصی اجلاس کی صدارت کرتے ہوئے کیا۔اجلاس میں دیہاڑی دار مزدوروں کو سوشل سکیورٹی سہولتیں فراہم کرنے کے لئے رجسٹریشن کارڈ جاری کرنے کی تجاویز کاجائزہ لیا گیا۔ وزیراعلی نے پنجاب بھر کے مزدوروں اور ورکرز کا جامع ڈیٹا مرتب کرنے کی ہدایت دیتے ہوئے حکم دیا کہ مزدوروں کے تحفظ کو یقینی بنانے کے لئے رسک سیکٹر کی نشاندہی کے لئے عالمی معیار کی لیب قائم کی جائے۔
مریم نواز نے ہدایت دی کہ ورکرز کے تحفظ کو یقینی بنانے کے لئے آکو پیشنل سیفٹی اینڈ ہیلتھ موبائل لیب پراجیکٹ شروع کیا جائے۔ وزیراعلیٰ مریم نوازشریف نے رائیڈر سروس فراہم کرنے والے موٹرسائیکل سوار نوجوانوں کے تحفظ کے لئے موثر قانون سازی کرنے کی بھی ہدایت دی۔
وزیراعلی پنجاب کو بریفنگ میں بتایا گیا کہ ورکروں اور مزدوروں کے لئے لیبر کالونیاں قائم کی جائیں گی۔ انہوں نے کہا صوبے بھر میں مرحلہ وار لیبر کالونیاں بنائیں گے۔ قائد اعظم بزنس پارک شیخوپورہ اور راولپنڈی میں لیبر کمپلیکس بنایاجائے گا۔
وزیر اعلیٰ مریم نواز شریف نے سندر اور ٹیکسلا میں لیبر کالونیوں کے پراجیکٹ جلد مکمل کرنے کاحکم بھی دیا ۔ انھوں نے کہا کہ شیخوپورہ اور راولپنڈی میں 1400مزدوروں اور 800 مزدور خاندانوں کو رہائش فراہم کی جاسکے گی۔مریم نوازشریف نے کہا کہ مزدور وں کو اپنا گھر او ر اپنی چھت فراہم کرنا میرا عزم ہے۔ انہوں نے کہا کہ فیکٹریوں میں ورکروں کے تحفظ کے لئے حفاظتی اقدامات پر عملدرآمد یقینی بنایا جائے گا۔
اجلاس میں پنجاب میں نافذ لیبر لاز کا جائزہ لیا گیا۔ سینئر صوبائی وزیر مریم اورنگزیب، صوبائی مشیرپرویز رشید، صوبائی وزیر محنت چوہدری شافع حسین، سیکرٹری لیبر، کمشنر پیسی، ڈی جی لیبر ویلفیئر، سیکرٹری پنجاب ورکر ویلفیئر فنڈ، سیکرٹری کم ازکم ویجیز بورڈ اور دیگر متعلقہ حکام نے اجلاس میں شرکت کی۔
اے پی پی /لاہور/حامد
