اسلام آباد،20مارچ (اے پی پی):وزیراعظم محمد شہبازشریف نے کہا ہے کہ ہم دوطرفہ باہمی تعلقات کو مزید مستحکم کرنے کے لئے برطانیہ کی قیادت کے ساتھ مل کر کام کرنے کے خواہاں ہیں،انہوں نے برطانیہ کے ساتھ تجارت ،سرمایہ کاری، موسمیاتی تبدیلی اور عوام کی سطح پر رابطوں سمیت علاقائی اور کثیر الجہتی معاملات پر ہم آہنگی کو فروغ دینے اور دونوں ممالک کے درمیان پی آئی اے کی پروازوں کی جلد بحالی پر زور دیا ۔
بدھ کو ان خیالات کا اظہار انہوں نے برطانوی ہائی کمشنر جین میریٹ سے گفتگو کرتے ہوئے کیا ۔وزیر اعظم نے دوبارہ منتخب ہونے پر مبارکباد کے پیغامات پر برطانوی وزیر اعظم رشی سونک اور وزیر خارجہ لارڈ ڈیوڈ کیمرون کا بھی شکریہ ادا کیا اور کہا کہ وہ دونوں ممالک کے درمیان تعلقات کو مزید مستحکم کرنے کے لئے برطانیہ کی قیادت کے ساتھ مل کر کام کرنے کے خواہاں ہیں۔
وزیراعظم نے کہا کہ پاکستان اور برطانیہ کے درمیان دیرینہ تاریخی تعلقات ہیں اور مختلف شعبوں میں تعاون کے ساتھ ساتھ بھرپور سیاسی خیرسگالی پائی جاتی ہے۔ انہوں نے کہا کہ پاکستان کی خواہش ہے کہ دوطرفہ تعلقات کو مزید وسعت دی جائے اور سٹرٹیجک پارٹنرشپ معاہدے کو جلد مکمل کیا جائے۔
وزیراعظم نے ملاقات میں حکومت کی معاشی ترجیحات بالخصوص ملک کو درپیش اقتصادی چیلنجوں سے نمٹنے کیلئے اقدامات کی اہمیت کا ذکر کیا۔ اس سلسلے میں وزیراعظم نے تجارت ،سرمایہ کاری، موسمیاتی تبدیلی، عوام کے درمیان رابطوں کے ساتھ ساتھ باہمی دلچسپی کے علاقائی اور کثیر الجہتی امور پر ہم آہنگی کو فروغ دینے کی ضرورت پر زور دیا۔ انہوں نے پاکستان اور برطانیہ کے درمیان پی آئی اے کی پروازوں کی جلد از جلد بحالی پر زور دیا جس سے دونوں ممالک کے درمیان روابط کو مضبوط بنانے اور برطانیہ میں مقیم 16 لاکھ پاکستانیوں کو آسانی حاصل ہو گی۔ انہوں نے برطانوی ہائی کمشنر سے کہا کہ وہ شاہ چارلس سوئم کے لئے ان کی نیک خواہشات پہنچا دیں اور ان کی جلد صحت یابی کے لئے دعا کی۔ وزیراعظم امید ظاہر کی کہ اپنی صحت یابی کے بعد وہ پاکستان کا دورہ کریں گے۔
