اسلام آباد،03 اپریل ( اے پی پی): وفاقی وزیر سمندر پارپاکستانیز اور ترقی انسانی وسائل چودھری سالک حسین سے ایران کے سفیر رضا امیری مقدم نے بدھ کو یہاں ملاقات کی ۔ ایران کے سفیر رضا امیری مقدم نے چودھری سالک حسین کو وزارت سنبھالنے پر مبارکباد دی۔ایرانی سفیر نے کہا کہ پاکستانی وزیر اعظم شہباز شریف کی دعوت پر ایرانی صدر جلد پاکستان کا دورہ کریں گے ۔
وفاقی وزیر چودھری سالک حسین نے کہا کہ پاکستان اور ایران دو ہمسایہ ملک ہیں ، دونوں کے درمیان تعاون بہت اہمیت کاحامل ہے،ایرانی صدر کے دورہ پاکستان کی خوشی ہے ،پچھلے دنوں جو معاملات ہوئے ان پر افسوس بھی ہے۔
ایرانی سفیرنے کہا کہ ایرانی صدر کے دورہ پاکستان میں تجارتی ، سیاحتی اور اقتصادی تعاون کو بڑھانے کی کوشش کرینگے، پاکستان اور ایران کو آئی ٹی کے شعبے میں مزید کام کرنے کی ضرورت ہے ۔انہوں نے کہا کہ پاکستان کو ایران کی وزارت کوآپریٹوز اور ڈائریکٹورٹ دفاتر جیسے اداروں سے جوڑنا چاہتے ہیں ،ایسا کرنے کے لیے دونوں ممالک کے متعلقہ محکموں کو باہمی روابط بڑھانے ہوں گے۔
وفاقی وزیر چودھری سالک حسین نے کہا کہ پاکستان اور ایران کو روزگار کے مواقع ، افرادی قو اور دیگر شعبوں میں تعاون بڑھانا ہوگا۔ چار سال قبل پاکستان اور ایران کے درمیان اس حوالے سے ایک ایم او یو سائن ہوا تھا۔انہوں نے کہا کہ ہم چاہتے ہیں کہ ایرانی صدر کے متوقع دورے میں اس اہم دستاویز پر دستخط کیے جائیں، ایران میں دی جانے والی فنی تربیت سے پاکستان بھی فائدہ اٹھانا چاہتا ہے۔
وفاقی وزیر چودھری سالک حسین نے مزید کہا کہ پاکستان اور ایران کی تجارت کو بڑھانا ہے تو اس میں تاخیر نہیں کرنی چاہیے۔
