اسلام آباد، 05 اپریل(اے پی پی):وزیر داخلہ محسن نقوی نے کہا دہشت گردی ایک بین الاقوامی مسئلہ ہے ، نمٹنےکیلئے مشترکہ حکمت عملی ترتیب دینا وقت کی ضرورت ہے۔دہشتگردوں کو امن و امان کی صورتحال خراب کرنے کی اجازت ہرگز نہیں دی جائے گی۔ پاکستان واحد ملک ہے جس نے دہشتگردی کے خلاف جنگ میں بے پناہ قربانیاں دی ہیں۔ پاک فوج اورسکیورٹی اداروں نے اس جنگ میں شجاعت اور بہادری کی داستان رقم کی ہے۔
ان خیالات کا اظہار انہوں نے برطانوی ہائی کمشنرجین میریٹ سے ملاقات کے دوران کیا۔
وفاقی وزیرداخلہ محسن نقوی نے برطانیہ کی ہائی کمشنر جین میریٹ کی اسلام آباد میں وزارت داخلہ آمد پر ان کا خیر مقدم کیا۔ وفاقی سیکرٹری داخلہ خرم آغا۔ برطانوی ہائی کمیشن کے حکام اور وزارت داخلہ کے متعلقہ افسران بھی اس موقع پرموجود تھے۔
دوطرفہ سیکیورٹی تعاون اور باہمی دلچسپی کے امور پر گفتگو کے ساتھ ساتھ پاکستان اور انگلینڈ کے درمیان کرکٹ سیریز پر بھی گفتگو ہوئی۔
برطانوی ہائی کمشنر نے کہا امید ہے کہ پاکستان اور انگلینڈ کے میچوں سے شائقین کرکٹ محظوظ ہوں گے۔
وفاقی وزیر داخلہ نے کہا پاکستان اور انگلینڈ کی ٹی ٹونٹی سیریز دونوں ٹیموں کی ورلڈکپ تیاری میں معاون ثابت ہوگی۔
ملاقات میں دونوں ممالک کے درمیان مختلف شعبوں میں تعلقات مزید مستحکم بنانے پر بھی اتفاق کیا گیا۔
برطانوی ہائی کمشنر جین میرٹ نے کہا کہ پاکستان کے ساتھ مختلف شعبوں میں تعاون کو فروغ دیتا چاہتے ہیں۔برطانوی ہائی کمشنر نے پی ایس ایل 9 کے کامیاب انعقاد پر محسن نقوی کو مبارکباد دیتے ہوئے کہا کہ پی ایس ایل کے میچ دیکھ کر بہت انجوائے کیا۔
انہوں نےبلامقابلہ سینٹر منتخب ہونے پر محسن نقوی کے لئے نیک خواہشات کا اظہار کرتے ہوئے کہا کہ محسن نقوی کی پی سی بی کے ساتھ وزارت داخلہ میں کامیابی کے لیے دعا گو ہوں۔
اس موقع پر اظہار خیال کرتے ہوئے وفاقی وزیر داخلہ نے کہا کہ پاکستان اور برطانیہ کے تاریخی تعلقات کی اہمیت اپنی جگہ مسلمہ ہے۔پاکستان مختلف شعبوں میں برطانیہ کے تعاون کو قدر کی نگاہ سے دیکھتا ہے۔پاکستان برطانیہ کے ساتھ درینہ تعلقات کو انتہائی اہمیت دیتا ہے۔باہمی تعلقات کے فروغ کیلئے وفود کے تبادلے ضروری ہیں۔ برطانیہ میں مقیم پاکستانی کمیونٹی کا دونوں ملکوں کی ترقی میں خصوصی کردار قابل تعریف ہے۔ انسانی سمگلنگ کی روک تھام کے لیے ہر ممکن اقدامات کئے جا رہے ہیں،پاکستان میں بسنے والے تمام شہریوں کی حفاظت حکومت کی اولین ترجیح ہے ۔
