اسلام آباد،06 اپریل(اے پی پی):وفاقی وزیر داخلہ محسن نقوی نے کہا ہے کہ دشمن پاکستان کی ترقی اور خوشحالی نہیں چاہتا،شر پسند عناصر کے مذموم مقاصد کو ہر گز کامیاب نہیں ہونے دیں گے۔
ان خیالات کا اظہار وفاقی وزیر داخلہ محسن نقوی نےچینی شہریوں کے سکیورٹی انتظامات پر ہفتہ کو یہاں وزارت داخلہ میں اہم اجلاس کی صدارت کرتے ہوئے کیا۔اجلاس میں وفاقی سیکرٹری داخلہ خرم آغا اور سینئر افسران نے شرکت کی۔
اجلاس میں غیر ملکیوں خصوصاً چینی شہریوں کی سکیورٹی کے اقدامات کا تفصیلی جائزہ لیا گیا۔وفاقی وزیرداخلہ محسن نقوی نے چینی شہریوں کی حفاظت کے لئے فول پروف اقدامات کی ہدایت کی اور کہا کہ غیر ملکیوں خصوصاً چینی شہریوں کا تحفظ اولین ذمہ داری ہے،غیر ملکیوں کی حفاظت کے ایس او پیز پر عملدرآمد کو یقینی بنایا جائے۔
اجلاس میں غیر ملکیوں خصوصاً چینی شہریوں کے تحفظ کے لئے کئے گئے انتظامات کے بارے میں بریفنگ دی گئی۔وفاقی وزیرمحسن نقوی نے چینی شہریوں کی فول پروف سکیورٹی کے حوالے سے وزارت داخلہ کے افسران کو ضروری ہدایات دیں۔
