اسلام آباد، 06 اپریل(اے پی پی ): وفاقی وزیر صنعت و پیداوار اینڈ فوڈ سیکیورٹی رانا تنویر سے پاکستان میں ایران کے سفیر نے ہفتہ کو یہاں ملاقات کی ، ملاقات میں دو طرفہ تعاون اور باہمی دلچسپی کے امور پر تبادلہ خیال ہوا اور ایران کی پاکستان کے ساتھ باہمی دلچسپی کے تمام شعبوں میں اپنے تعلقات کو مزید مضبوط بنانے کی خواہش کا بھی اعادہ کیا گیا۔
وفاقی وزیر صنعت و پیداوار اینڈ فوڈ سیکیورٹی رانا تنویر نے کہا کہ پاکستان اور ایران دونوں برادر اور پڑوسی ملک ہیں۔انہوں نے کہا کہ ایران اور پاکستان ایک مضبوط رشتے سے جڑے ہوئے ہیں ، دونوں ممالک صنعتی تعاون پر کام کر سکتے ہیں۔
ایرانی سفیر ڈاکٹر رضا امیری مقدم نے کہا کہ ایران کی اعلیٰ قیادت پاکستان کے ساتھ تمام شعبوں میں قریبی تعاون بڑھانے کی حامی ہے ۔انہوں نےکہا کہ پاکستان سے گوشت چاول زرعی پیداوار بالخصوص آم، کینو، مزید امپورٹ کرنا چاہتے ہیں کیونکہ ایرانی عوام پاکستان کے کنو کو بہت پسند کرتی ہے۔وفاقی وزیر رانا تنویر نے کہا کہ پاکستان کا باسمتی چاول دنیا بھر میں مشہور ہے ۔
ایرانی سفیر نے کہا کہ ایرانی صدر کے متوقع آئندہ دورہِ پاکستان میں دونوں ممالک کے درمیان لائیو سٹاک، کورنٹاین اور پلانٹ پروٹیکشن پر ایم او یو پر دستخط متوقع ہیں۔ ایرانی سفیر نے کہا کہ دونوں ممالک فرٹیلزر انڈسٹری میں تعاون کر سکتے ہیں۔انہوں نے شنگهائی تعاون تنظیم کے آئندہ اجلاس میں شرکت کے لئے ایرانی وزیر صنعت کی جانب سے وفاقی وزیر کو دورہ تہران کی دعوت دی ، وفاقی وزیر رانا تنویر نے دعوت نامہ کا خیرمقدم کیا ۔
