لاہور،6اپریل (اے پی پی):گورنر پنجاب محمد بلیغ الرحمن سے چیئرمین امپلمنٹیشن مینارٹی رائٹس فورم(IMRF)سیموئیل پیارا اور ایڈوائزر(IMRF)ایمونئیل پرویز کی قیادت میں ملائشیا سے آئے وفد نے بدھ کو یہاں گورنر ہائوس میں ملاقات کی۔
اس موقع پر گفتگو کرتے ہوئے گورنر پنجاب نے کہا کہ مسیحی برادری کی قیام پاکستان سے لے کر اب تک ملک کی تعمیر و ترقی کے لئے خدمات لائق تحسین ہیں ۔انہوں نے کہا کہ اقلیتوں کو بنیادی حقوق کی فراہمی، ان کے جان و مال کا تحفظ اورانہیں ترقی کے مواقع فراہم کرنا حکومت کی ترجیح ہے۔
گورنر نے کہا کہ سرکاری ملازمتوں میں اقلیتوں کیلئے کوٹہ مختص کیا گیا جبکہ پارلیمنٹ میں بھی اقلیتوں کو نمائندگی دی گئی ہے، پاکستان کے آئین اور قانون کے مطابق اقلیتوں کو مساوی حقوق اور مذہبی آ زادی حاصل ہے۔انہوں نے کہا کہ مسیحی برادری نے تشکیل پاکستان کی جدوجہد میں بھر پور کردار ادا کیا تھا اور آج بھی وہ ملکی ترقی و خوشحالی میں بڑھ چڑھ کر حصہ لے رہی ہے۔
چیئرمین امپلمنٹیشن مینارٹی رائٹس فورم(IMRF)سیموئیل پیارانے کہا کہ پاکستان کا آئین اقلیتوں کے حقوق کے تحفظ کے حوالے سے دنیا کا بہترین آئین ہے۔انہوں نے کہا کہ پاکستان میں بسنے والی تمام اقلیتوں کو برابر کے حقوق اور مذہبی آزادی حاصل ہے۔
وفد میں پروفیسر امتیاز عنایت، اونگ کاہ یونگ آلوین،جاسن فلپس، ڈارون فلپس اور سنیتا انجلیق فلپس شامل تھے۔
