اسلام آباد ، 18 اپریل(اے پی پی): وفاقی وزیر اطلاعات عطاءاللہ تارڑ نےجمعرات کے روز میڈیا سے گفتگو کرتے ہوئے کہا کہ 9 مئی کے حملہ آور آج ملکی مفاد پر حملہ آور ہیں اور ملکی مفاد کے خلاف بات کرنے والا پاکستان کا دشمن ہے۔
وفاقی وزیر اطلاعات نے کہا کہ اپنے سیاسی مفاد اور اناءکو ملکی مفاد پر ترجیح دینا قابل مذمت اور افسوسناک ہے، تحریک انصاف نے پہلے ملکی مفاد کے خلاف بیان دیا پھر اس سے لاتعلقی کا اظہار کیا، یہ پی ٹی آئی کا پرانا وطیرہ ہے۔
عطا تارڑ نے کہا کہ ملک میں سرمایہ کاری پاکستان کے دشمنوں کو ہضم نہیں ہو رہی، ایسے عناصر کے لئے ہدایت کی دعا کرتے ہیں، کاش یہ ملک کے مفاد میں بھی بات کر سکیں، سیاسی مخالفت میں ملک دشمنی نامناسب ہے، آپ ہم پر تنقید کریں لیکن پاکستان پر تنقید ناقابل برداشت ہے۔
وزیر اطلاعات نے مزید کہا کہ ہمارے دوست ممالک پاکستان میں سرمایہ کاری و تعاون کی حمایت اور دوستی کا ہاتھ بڑھا رہے ہیں، ہم اپنے دوست ممالک کے ساتھ روابط بڑھائیں گے اور پاکستان انشاءاللہ ترقی کرے گا۔
