اسلام آباد،24 اپریل (اے پی پی ): وزیراعظم محمد شہباز شریف سے چیئرمین بزنسمین گروب محمد زبیر موتیوالا کی سربراہی میں کراچی چیمبر آف کامرس کے وفد نے بدھ کو یہاں ملاقات کی۔ ملاقات میں وفد کے ارکان نے وزیراعظم کو پاکستان میں کاروباری برادری کو درپیش مختلف مسائل کے حوالے سے بریفنگ دی اور حکومت کی کاروبار دوست پالیسیوں کی بدولت کراچی اسٹاک ایکسچینج کے 72000 پوائنٹس کی بلد ترین سطح عبور کرنے پر مبارکباد پیش کی۔
وفد نے وزیراعظم کو خراج تحسین پیش کرتے ہوئے کہا کہ پہلی مرتبہ ایسا وزیراعظم دیکھا جو دوبارہ منتخب ہونے کے بعد کام وہیں سے شروع کرتا ہے جہاں سے چھوڑا تھا اور ماضی میں لیے گئے اقدامات پر عمل درآمد کی حکمت عملی پر بات کرتا ہے۔
وزیر اعظم نے ملاقات میں وفد کو کہا کہ ملکی ترقی کاروباری برادری کی ترقی سے منسلک ہے، ملک میں ایسا ماحول پیدا کرنا ناگزیر ہے جس میں کاروباری برادری کو اپنے کام میں آسانی میسر ہو اور ملکی شرح نمو میں خاطر خواہ اضافے کے لیے ضروری ہے کہ ملکی برآمدات میں اضافہ ہو۔
وزیراعظم نے متعلقہ حکام کو ملکی کاروباری برادری کے مسائل حل کرنے اور ملکی صنعتوں کو گیس اور بجلی جیسی بنیادی سہولیات کی فراہمی کو یقینی بنانے کی ہدایت کی۔
