اسلام آباد،24 اپریل (اے پی پی ):صدر مملکت آصف علی زرداری سے چائنہ انٹرنیشنل ڈویلپمنٹ کوآپریشن ایجنسی کے چیئرمین لوؤچاؤہوئی کی قیادت میں وفد نے بدھ کو یہاں ملاقات کی ۔ چیئرمین لوؤچاؤہوئی نے صدر مملکت کو پاکستان کی سماجی و اقتصادی ترقی میں ایجنسی کے کردار کے بارے آگاہ کیا اور سیاحت اور زرعی تعاون فروغ دینے کی ضرورت پر زور دیا۔
صدر مملکت نے کہا کہ پاکستان اور چین کے درمیان طویل المدتی تزویراتی تعلقات ہیں اور پاک-چین تعلقات کو تجارت، معیشت، زراعت، عوامی روابط اور ثقافت کے شعبوں میں مزید مضبوط کرنے کی ضرورت ہے۔ انہوں نے کہا کہ پاکستان سی پیک کو تزویراتی اہمیت کا حامل منصوبہ سمجھتا ہے، تمام سی پیک منصوبوں کی بروقت تکمیل کے لیے پرعزم ہے اور گوادر بندرگاہ سے علاقائی روابط کو فروغ ملے گا، چین تک سامان کی نقل و حمل سستی ہو گی۔
صدر مملکت نے انسانی وسائل کو چین کی ضروریات کے مطابق ہنر سے آراستہ کرنے کیلئے مشترکہ تربیتی منصوبے شروع کرنے کی تجویز دی اور بشام میں چینی شہریوں پر دہشت گردانہ حملے پر افسوس کا اظہار کرتے ہوئے کہا کہ پاکستان چینی شہریوں ، سرمایہ کاروں کو پاکستان میں محفوظ ماحول فراہم کرنے کیلئے ہر ممکن کوشش کرے گا۔
لوؤ چاؤ ہوئی نے کہا کہ دونوں ممالک کے دشمن دوطرفہ تعلقات کو نقصان پہنچانا چاہتے ہیں ، اپنے عزائم میں کبھی کامیاب نہیں ہوں گے۔
صدرِمملکت نے پاکستان کی اقتصادی ترقی میں اہم کردار ادا کرنے پر چینی حکومت کا شکریہ ادا کیا اورسیلاب متاثرہ افراد کی بحالی ، خیبرپختونخوا اور سندھ میں اسکولوں کی تعمیر نو میں ایجنسی کے کردار کو سراہا اور اسکے علاوہ سندھ اور بلوچستان میں لیڈی ہیلتھ ورکرز کے لیے گھروں کی تعمیر میں بھی ایجنسی کے کردار کی بھی تعریف کی۔
اجلاس میں چینی سفیر چیانگ زئے ڈونگ ، ڈپٹی چیئرمین پلاننگ کمیشن ڈاکٹر جہانزیب خان اور چینی اور پاکستانی اعلیٰ حکام نے شرکت کی۔
