جدہ،29 اپریل(اے پی پی):سعودی عرب نے ہمیشہ کشمیر کی آزادی کے معاملے اور کشمیر کے مسئلے کے پر امن حل کیلئے ہر فورم پر پاکستان کی بھر پور حمایت کی ہے جس کے لئے مقبوضہ کشمیر کی تنظیمیں سعودی قیادت کی شکر گزار ہیں۔
یہ بات جدہ میں تحریک آزادی کشمیر پر کام کرنے والے چیئرمین عالمی فورم انصاف و امن واشنگٹن ڈاکٹر غلام نبی فائی نے قونصل جنرل خالد مجید کی رہائش گاہ پر پاکستانی اور کشمیر کمیونٹی سے اپنے خطاب میں کہی، تقریب میں بڑے پیمانے پر مقامی سعودی تجار اور مختلف شعبوں سے تعلق رکھنے والے سعودی افراد اور پاکستانی کمیونٹی نے بھر پور شرکت کی۔
مہمان خصوصی ڈاکٹرغلام نبی فائی نے اپنے خطاب میں کہا کہ ہندوستان نے سیکورٹی کونسل کی قراردادوں کو ماننے سے انکار کیا ہے جس میں کشمیریوں کو حق خود اختیاری دینے کی قراردادیں 1948ء میں منظور کی گئیں تھیں۔ انہوں نے کہا کہ آج مسلمان دنیا کے مسائل میں اضافہ ہوگیا ہے، آج فلسطین، کشمیر، روہنیاء، شام، افغانستان کے مسلمانوں کا بھی مسئلہ ہے جہاں مسلمانوں کے ساتھ ناروا سلوک رکھا جارہا ہے۔
ڈاکٹر فائی نے کہا غزہ کے بچوں کی بلکتی سسکیاں ہمیں سونے نہیں دیتیں، ان کی دیکھ بھال بھی مسلمان دنیا کا فرض ہے، آج مودی سرکار علاقے میں ایک دہشت گرد ریاست بن چکی ہے اور مشرق وسطی کا امن اسرائیل تباہ کررہا ہے۔
ڈاکٹر فائی نے کہا کہ وزیر اعظم شہباز شریف سے ملاقات میں ولی عہد شہزادہ محمد بن سلمان نے ایک مرتبہ پھر کشمیر کے پرامن حل پر زور دیا ہے پاکستان نے ہمیشہ بات چیت سے مسئلے کے حل زور دیا ہے مگر بھارت دہشت گردی سے نہ صرف کشمیر بلکہ بھارت کے اندر بسنے والوں پر ظلم و ستم کا نشانہ بنا رہاہے، ان کے مذہبی معاملات میں رکاوٹیں کھڑی کررہا ہے، مساجد منہدم کررہا ہے، او آئی سی،اور دیگرعالمی اداروں کو اس طرف فوری توجہ کی ضرورت ہے۔انہوں نے کہا کہ اوآئی سی ہمیشہ کشمیر کو اپنی قراردادوں میں شامل رکھتی ہے جس کے لئے کشمیری سعودی قیادت اور او آئی سی ممالک کے شکر گزار ہیں۔
قونصل جنرل خالد مجیدنے اپنے خطاب میں ڈاکٹر فائی کو جدہ میں خوش آمدید کہتے ہوئے تحریک آزادی کشمیر کیلئے طویل جدوجہد پر انہیں خراج تحسین پیش کیا۔
تقریب سے سعودی سفارت خانہ اسلام آباد میں سابق ملٹری اتاشی جنرل (ر) عبداللہ سعید الغامدی نے اپنے خطاب میں بھارتی بی جے پی،آر ایس ایس کی جانب سے کشمیری مجاہدین پر ڈھائے جانے والے مظالم کی سخت مذمت کی۔انہوں نے کہا کہ آج یہودی بھی فلسطین میں وہی کام کررہے ہیں جو بھارتی حکومت کشمیر میں کررہی ہے۔
تقریب سے سعودی بزنس مین سالم القحطانی نے بھی اپنے خطاب میں کشمیریوں کی بھرپور حمایت کرتے ہوئے کہا کہ کہ مسلم دنیا کو کشمیر اور فلسطین کے مسائل کے حل کیلئے مضبوط لائحہ عمل مرتب کرنا ہوگا۔
تقریب سے چیئرمین جموں و کشمیر پیپلز فریڈم اور سابق کنونیئر آل پاکستان حریت کانفرنس محمد فارو ق رحمانی، چئیرمین کشمیر کمیٹی جدہ مسعود احمد پوری اور سردار وقاص عنایت صدر جموں و کشمیر اوؤرسیز کمیونٹی نے بھی خطاب کیا۔
