اسلام آباد، 3مئی(اے پی پی): وزیراعظم محمد شہباز شریف سے جمعہ کے روز بل اینڈ میلنڈا گیٹس فاؤنڈیشن کی گلوبل ڈویلپمنٹ ڈویثرن اور پولیو اوورسائٹ بورڈ (Polio Oversight Board) کے صدر ڈاکٹر کرسٹوفر ایلائییس کی زیر سربراہی عالمی انسداد پولیو اقدام (Global Polio Eradication Initiative) کے وفد کی ملاقات ہوئی۔
وفد نے وزیراعظم کو پاکستان میں انسداد پولیو کے حوالے سے جاری اقدامات پر پیشرفت کے حوالے سے آگاہ کیا اور پاکستان میں پولیو کی امیونائیزیشن کے اقدامات میں درپیش مسائل کے حوالے سے آگاہ کیا۔
وزیر اعظم نے کہا کہ پولیو ایک موذی مرض ہے، اس کے پاکستان سے مکمل خاتمے کیلئے ہم انشاء اللہ بہت جلد عالمی شراکت داروں کے تعاون اور ملکی اداروں کی انتھک محنت سے پولیو کا مکمل خاتمہ کرنے میں کامیاب ہوں گے۔
وزیراعظم نے وزارت اطلاعات و نشریات کو عالمی انسداد پولیو اقدام کے ساتھ پاکستان میں پولیو کے خاتمے کے لیے ایک مشترکہ ہمہ گیر آگاہی مہم چلانے کی ہدایت کی۔
وفد میں ریجنل ڈائریکٹر عالمی ادارہ صحت ایمرو ریجن (EMRO) ڈاکٹر حنان بلخی، جنوبی ایشیاء کیلئے ریجنل ڈائریکٹر یونیسیف سنجے ویجیسیکرا، سنٹر فار ڈیزیز کنٹرول کے پولیو برانچ چیف ڈاکٹر اوموٹایو بولو، پاکستان میں عالمی ادارہ صحت کے نمائندہ ڈاکٹر لؤو ڈاپینگ، پاکستان میں یونیسیف کے نمائندے عبداللہ فاضل، عالمی ادارہ صحت کے ڈائریکٹر انسداد پولیو، ڈاکٹر حامد جعفری اور ڈپٹی ڈائریکٹر پولیو بل اینڈ ملانڈہ گیٹ فاونڈیشن مائیکل گیلوے شامل تھے۔
ملاقات میں وفاقی وزیر اطلاعات و نشریات عطا اللہ تارڑ، وزیر مملکت شزا فاطمہ خواجہ، وزیراعظم کے کوآرڈینیٹر برائے صحت مختار ملک اور متعلقہ اداروں کے اعلیٰ افسران شریک تھے۔
