لاہور،07مئی( اے پی پی ): وزیراعلیٰ پنجاب مریم نواز شریف کی پلاننگ اینڈ ڈویلپمنٹ بورڈ آمد، وزیر اعلیٰ کی زیر صدارت پانچ گھنٹے طویل اجلاس ہوا۔اجلاس میں سی ایم سپیشل پراجیکٹس اور اقدامات کا تفصیلی جائزہ لیا گیا ۔
اجلاس سے خطاب کرتے ہوئے وزیر اعلیٰ پنجاب مریم نواز نے کہا کہ 33 سی ایم ترقیاتی پراجیکٹس میں تاخیر نہیں ہونی چاہیے، منصوبوں کی بروقت تکمیل کے لئے دن رات محنت کی جائے،ہیلتھ پراجیکٹس کی بروقت تکمیل پر پوری توجہ دی جائے ۔
وزیر اعلی نے نواز شریف انسٹیٹوٹ آف کینسر لاہور کا پہلا فیز سال کے اندر مکمل کرنے کی ہدایت کی اور سرگودھا میں نواز شریف انسٹیٹیوٹ آف کارڈیالوجی کا اوپی ڈی دسمبر 2025 میں کھولنے کا حکم دیا ۔
وزیر اعلی کو بریفنگ کے دوران بتایا گیا کہ ہیلتھ سیکٹر میں 145 ارب روپے کی لاگت سے 7 میگا پراجیکٹ زیر تکمیل ہیں۔ دیہی اور بنیادی مراکز صحت کی تعمیر و بحالی کا پہلا مرحلہ اکتوبر میں مکمل کر لیا جائے گا، بڑے ہسپتالوں کی ری ویمپنگ جون تک مکمل کر لی جائے گی ۔
بریفنگ میں بتایا گیا کہ پنجاب میں اہم روٹ پر5-ایکسپریس ویز پر 176 ارب روپے لاگت سے بنیں گی ۔ملتان وہاڑی روڈ،چیچہ وطنی تا چوک اعظم ، ساہیوال سمندری ،بہاولپور تا جھانگرہ،فیصل آباد چنیوٹ سرگودھا روڈ کی تعمیر و توسیع کا جائزہ بھی لیا گیا۔
وزیر اعلیٰ مریم نواز نے تمام محکموں کے لئے ایک کمپلینٹ نمبر مخصوص کرنے کی ہدایت کی۔وزیر اعلی کو بریفنگ کے دوران بتایا گیا کہ لاہور میں 204 بیڈ کا تین منزلہ سیف سٹی ہوسٹل کی تعمیر اسی ماہ شروع ہوگی۔ اضلاع میں سمارٹ سیف سٹی یکم جنوری تک فنکشنل ہوں گے،پنجاب میں ساٹھ لاکھ پودے لگائے گئے ،پنجاب میں وائلڈ لائف سروے کرایا جائے گا ۔
بریفنگ کے دوران مزید بتایا گیا کہ پنجاب میں گلوبل آئی ٹی سرٹیفکیٹ پروگرام شروع ہے۔سی ایم سکل ڈویلپمنٹ پروگرام کے تحت 4ہزار نوجوان آئی ٹی کورسز کرینگے۔پراونشنل ڈیٹا بیس اتھارٹی کے تحت سوشل رجسٹری سروے شروع ، جون میں تکمیل کا ہدف مقررکیا گیا ہے ۔ائیر ایمبولینس سروس جون جبکہ موٹر وے ایمبولینس سروس دسمبر تک شروع ہو جائے گی ۔لاہور میں تین سو اور دیگر شہروں میں 330 الیکڑک بسیں چلائی جائیں گی ۔
اجلاس میں الیکٹرک بسوں کی مقامی سطح پر تیاری کے تجویز کا جائزہ لیا گیا اور پنجاب ڈےکئیر فنڈ سوسائٹی کی تحت سرکاری دفاتر میں ڈے کیئر سینٹر قائم ہوگا۔
سینئر صوبائی وزیر مریم اورنگزیب، صوبائی وزراء عظمیٰ زاہد بخاری، مجتبیٰ شجاع الرحمن ، شیر علی گورچانی، خواجہ عمران نذیر، خواجہ سلمان رفیق، فیصل ایوب کھوکھر، ذیشان رفیق، بلال اکبر، عاشق حسین کرمانی، ایم پی اے ثانیہ عاشق، چیف سیکرٹری، چیئرمین پلاننگ اینڈ ڈویلپمنٹ بورڈ، آئی جی ،سیکرٹریز اور دیگر حکام نے اجلاس میں شرکت کی ۔
