اسلام آباد ،08 مئی (اے پی پی):امریکہ میں پاکستانی سفیر مسعود خان نے کہا ہے کہ حکومت اور پاکستان کے عوام سکھ برادری کے مذہبی جذبات کا مکمل ادراک رکھتے ہیں ہمارے دروازے سکھ برادری کے لئے کھلے ہیں۔ پاکستان میں سکھوں کے مذہبی مقامات کی یاترا کے حوالے سے دنیا بھر کی سکھ برادری کو بھرپور تعاون کی فراہمی کا سلسلہ حسب روایت جاری رہےگا۔انہوں نے کہا کہ مذہبی سیاحت کے حوالے سے ویزہ پالیسی مختلف عقائد کے پیروکاروں کے جذبات کو مدنظر رکھتے ہوئے انتہائی آسان بنا دی گئی ہے جس کا مقصد زیادہ سے زیادہ سہولیات فراہم کرنا ہے۔
سفیر پاکستان نے یہ بات امریکن پنجابی سوسائٹی کے ایک وفد سے امریکن ایمبیسی واشنگٹن میں بات چیت کرتی ہوئے کہی۔
مسعود خان نے وفد کا سفارت خانے میں خیر مقدم کرتے ہوئے کہا کہ پاکستانی حکومت اور عوام سکھ برادری کے مذہبی جذبات کا احترام کرتے ہیں اور اس حوالےسے ہم سکھ برادری کو ہر ممکنہ سہولت فراہم کرتے رہیں گے۔
امریکن پنجابی سوسائٹی کے صدر گیری سکاّ نے کہا کہ سوسائٹی کا 115 رکنی وفد مذہبی مقامات کی یاترا کے لیے پاکستان کا دورہ کر ے گا ۔وفد اس دوران لاہور، فیصل آباد، اسلام آباد اور کرتارپور بھی جائےگا۔
وفد میں شامل سکھ برادری کے افراد نے اپنے سابقہ دوروں خصوصاً کرتاپور کی یاترا کا حوالے دیتے ہوئے کہا کہ پاکستانی عوام کی مہمان نوازی دلوں کو موہ لیتی ہے۔
امریکن پنجابی سوسائٹی کے صدر گیری سکا نے سفیر کو بتایا کہ سوسائٹی ایک لاکھ پنجابی سکھ ممبران پر مشتمل ہے جن میں سے کچھ کا تعلق پاکستان سے بھی ہے۔
وفد نے سکھ برادری کو ان کے مذہبی مقامات کی زیارت کی سہولت فراہم کرنے پر حکومت پاکستان کا شکریہ بھی ادا کیا۔
