اسلام آباد،10مئی (اے پی پی):روبینہ خالد نے باضابطہ طور پر بینظیر انکم سپورٹ پروگرام (بی آئی ایس پی) کی چیئرپرسن کا عہدہ سنبھال لیا ہے۔
اس موقع پر بی آئی ایس پی کے ملازمین سے افتتاحی خطاب میں انہوں نے تعلیم اور معاشی مواقع کے ذریعے پسماندہ کمیونٹیز کو بااختیار بنانے کے اپنے وژن کا اظہار کیا اور پروگرا م کی اہمیت پر زور دیا ۔
روبینہ خالد نے کہا کہ بینظیر انکم سپورٹ پروگرام کا نام میرے لیے مقدس ہے کیونکہ یہ شہید محترمہ بینظیر بھٹو کے نام پر رکھا گیا ہے، جن کا مشن ہمارا کام ہے۔ انہوں نے کہا کہ ملازمین پروگرام سے مستفید ہونےوالوں کی خدمت میں دیانت داری اور شفافیت کے اعلیٰ ترین معیار کو برقرار رکھیں جو زیادہ تر یتیم اور بیوہ ہیں۔ انہوں نے کہا کہ ہمارا فرض ہے کہ ہم اس بات کو یقینی بنائیں کہ ہر ایک پیسہ ان لوگوں تک پہنچے جنہیں اس کی سب سے زیادہ ضرورت ہے۔
بی آئی ایس پی ٹیم کے اہم کردار کو تسلیم کرتے ہوئے روبینہ خالد نے غیر متزلزل لگن اور ایمانداری کے لیے اپنی توقعات کا اظہار کیا۔ انہوں نے امید ظاہر کی کہ ہم پوری ایمانداری کے ساتھ مل کر کام کریں گے کیونکہ یہ غریب لوگوں کا پیسہ ہے۔ ہمیں ادائیگیوں کی تقسیم میں شفافیت کو یقینی بنانا ہےاور اس سلسلے میں آپ کے مکمل تعاون کی ضرورت ہے۔
قبل ازیں بی آئی ایس پی کے سابق چیئرپرسن ڈاکٹر امجد ثاقب نے عوام کی فلاح و بہبود کے لیے ان کے دیرینہ عزم کو سراہتے ہوئے ان کا پرتپاک استقبال کیا۔ سیکرٹری بی آئی ایس پی عامر علی احمد نے روبینہ خالد کو بی آئی ایس پی کے بنیادی اقدامات اور حال ہی میں شروع کیے گئے پروگراموں کے بارے میں ایک جامع بریفنگ دی۔
روبینہ خالد نے پسماندہ افراد کے لیے ہنرمندی کے مواقع بڑھانے میں گہری دلچسپی کا اظہار کیا اور امدادی رقوم کی تقسیم کے عمل میں وقار اور احترام کو برقرار رکھنے کی اہمیت پر زور دیا۔
