ڈبلن،12مئی(اے پی پی):چئیرمین پاکستان کرکٹ بورڈ محسن نقوی نے قومی کرکٹ ٹیم کے کھلاڑیوں سے اتوار کو یہاں ملاقات کی، دو گھنٹے طویل ملاقات میں دورہ آئرلینڈ و انگلینڈ اور ٹی ٹوئنٹی ورلڈکپ کی تیاریاں متعلق حکمت عملی پر تفصیلی مشاورت کی گئی۔
چئیرمین پی سی بی محسن نقوی نے کھلاڑیوں کا حوصلہ بڑھایا اور محنت، جذبے اور پروفیشنل اپروچ کے ساتھ کھیلنے کی تلقین کی۔انہوں نے کہا کہ ٹی ٹوئنٹی کرکٹ یکسر مختلف اور جارحانہ اپروچ کی حامل گیم ہے جسے جدید و نئے انداز کے مطابق کھیل کر ہی جیت ممکن ہو گی۔
محسن نقوی نے کہا کہ کمرے میں بیٹھ کر حکمت عملی ترتیب دی جا سکتی ہے لیکن اصل امتحان میدان میں ہوتا ہے، جہاں پرفارمنس نظر آنی چاہیے، بلاشبہ تمام کھلاڑی باصلاحیت، پروفیشنل اور بہترین ہیں،قومی ٹیم کا باولنگ اٹیک شاندار ہے تاہم فیلڈنگ پر بہت توجہ کی ضرورت ہے تاکہ مخالف ٹیم کو کوئی بھی چانس نہ مل سکے ۔
چئیرمین پاکستان کرکٹ بورڈ محسن نقوی نے کہا کہ کھلاڑی پاکستان کیلئے امید ہیں اور آپ نے قوم کی توقعات پر پورااترناہے، فتح کے لیے ٹیم ورک بنیادی چیز ہے، گیارہ کھلاڑی ایک ہوکرپاکستان کے لئے جان لڑا دیں گے تو کامیابی قدم چومے گی۔
محسن نقوی نے کہا کہ پاکستانی قوم کرکٹ سے محبت کرتی ہے اور قوم کو اپنے کھلاڑیوں سے امیدیں ہیں۔انہوں نے ہدایت کی کہ آخری بال تک مقابلہ کریں، مقابلہ ہوتا دکھائی دینا چاہیے۔انہوں نے کہا کہ آئرلینڈ سے پہلے میچ میں شکست کو کوئی بھی قبول نہیں کر رہا، آئرلینڈ اور انگلینڈ کے بعد اصل امتحان ورلڈکپ ہے۔
