مظفر آباد،16مئی(اے پی پی):وزیراعظم محمد شہبازشریف نے کہا ہے کہ آزاد کشمیر میں احتجاجی تحریک کے دوران شر پسند عناصر کی طرف سےصورتحال کو بگاڑنے اور جلاؤگھیراؤ کی کوششیں ناکام ہو گئیں،معاملات کو بہتر طریقے سے حل کر لیاگیا،آزاد کشمیر کے عوام پاکستان کے ساتھ والہانہ محبت کرتے ہیں، پاکستان کشمیری عوام کے لئے پوری دنیا میں آواز اٹھاتا رہےگا، بھارت کے غیر قانونی زیر تسلط جموں و کشمیر اور فلسطین کی صورتحال پر دنیاخامو ش تماشائی بنی ہوئی ہے،وہ دن دور نہیں جب کشمیری اور فلسطینی عوام کو ان کے حقوق ملیں گے۔
ان خیالات کا اظہارانہوں نے جمعرات کو آزاد جموں و کشمیر کابینہ کے اجلاس سے خطاب میں کیا۔ وزیراعظم نے کہا کہ صورتحال کو کنٹرول کرنے میں کردار ادا کرنے پر صدر مملکت اور اتحادیوں کا شکر گزار ہوں،تحریک چلانے والوں نے اپنے جائز معاملات کے لئے ایک جمہوری اندازمیں اپنا احتجاج ریکارڈکرایا لیکن اس تحریک میں بعض ایسے شر پسند عناصر تھے جن کا مقصد تھا کہ کسی طریقے سے آزاد جموں و کشمیر میں توڑ پھوڑ،انسانی جانوں کاضیاع اور جلاؤ گھیراؤ کیا جائے ۔
آزاد کشمیر کی مضبوط اور جاندار قوم اپنے مفاد کو بہتر طریقے سے جانتی ہے۔ پاکستان کے 25 کروڑ عوام کشمیریوں کی قربانیوں کو قدر کی نگاہ سے دیکھتے ہیں،کشمیریوں کی قربانیاں رائیگاں نہیں جائیں گی۔
انہوں نے کہا کہ وفاقی حکومت نےآزاد کشمیر کے لئے 23 ارب روپے کا پیکج منظور کیا ۔ 23 ارب روپے آزاد کشمیر حکومت کے اکاؤنٹ میں منتقل ہو چکے ہیں، یہ کوئی احسان نہیں ہمارا فرض ہے۔ کشمیر پاکستان کی شہ رگ ہے، پاکستان اور کشمیر کے عوام کی ایک دوسرے کے ساتھ والہانہ محبت ہے۔
اس موقع پر آزاد کشمیر میں احتجاجی تحریک کے دوران جا ں بحق ہونے والے افراد کے ایصال ثواب کے لئے فاتحہ خوانی بھی کی گئی۔
