اسلام آباد، 16 مئی (اے پی پی): وزیرِ اعظم محمد شہباز شریف کی زیر صدارت مسلم لیگ نواز کے ارکان قومی اسمبلی اور وفاقی وزراء کا اجلاس جمعرات کو یہاں منعقد ہوا جس میں ارکان کو حکومتی معاشی پالیسیوں، بیرونی سرمایہ کاری اور سیاسی صورتحال پر اعتماد میں لیا گیا۔
ارکانِ قومی اسمبلی نے ملکی سیاسی صورتحال پر مشاورت کی اور وزیرِ اعظم کی قیادت میں ملکی معاشی استحکام کیلئے اقدامات اور سفارتی محاذ پر کامیابیوں پر وزیرِ اعظم کو خراج تحسین پیش کیا ۔
وزیرِ اعظم نے ارکان سے خطاب میں کہا کہ اللہ کے فضل و کرم سے پاکستان معاشی استحکام کی جانب گامزن ہے اور بیرونی سرمایہ کے فروغ اور سفارتی محاذ پر کامیابیوں کا سہرا پوری حکومتی ٹیم کو جاتا ہے۔
شہباز شریف نے کہا کہ پوری کوشش کر رہے ہیں کہ عوام کو ذیادہ سے ذیادہ ریلیف پہنچائیں اور مجھے پورا اعتماد ہے کہ اگر یونہی محنت جاری رکھی تو پاکستان کے معاشی حالات انشاء اللہ جلد ٹھیک ہو جائیں گے۔
وزیرِ اعظم نے اجلاس میں موجود وفاقی وزراء اور ارکان قومی اسمبلی کی شرکت پر انکا شکریہ ادا کیا۔
