اسلام آباد،17 مئی(اے پی پی):وفاقی وزیرداخلہ محسن نقوی نے نادرا ہیڈ کوارٹر کا دورہ کیا اور اہم اجلاس کی صدارت کی جس دوران نادرا کو عوام دوست بنانے کے لیے مختلف تجاویز کا جائزہ لیا گیا۔
اجلاس میں پاکستان بھر میں یونین کونسل کی سطح پر شناختی کارڈ بنانے اور تجدید کی سہولت دینے کا فیصلہ کیا گیا،پاکستان بھر میں یونین کونسل کی سطح پر بائیو میٹرک مشینیں لگائی جائیں گی۔ وفاقی وزیر داخلہ نے یونین کونسل کی سطح پر شناختی کارڈ اور تجدید کی سہولت فراہم کرنے کے پلان کو چند روز میں حتمی شکل دینے کی ہدایت کی۔انہوں نے شناختی کارڈز کے نظام کو فول پروف، بہتر اور تیز رفتار بنانے کا پلان بھی طلب کیا۔
وزیر داخلہ محسن نقوی نے کہا کہ انہوں نے مختلف نادرا سنٹرز کے دورے کئے اور حالات کا جائزہ لیا، عوام کو مشکلات کا سامنا ہے۔ایسا پلان بنایا جائے جس سے نادرا سنٹرز پر آنے والوں کو آسانی ہو اور کام بلا تاخیر ہو۔ انہوں نے 6 بڑے شہروں میں نادرا سنٹرز میں اضافے کا 7 روز میں پلان طلب کیا اور کراچی،لاہور، پشاور،کوئٹہ، اسلام آباد، راولپنڈی میں مزید سنٹرز بنانے کے حوالے سے فوری اقدامات کی ہدایت کی۔انہوں نے جعلی شناختی کارڈ مافیا کے خاتمے کے لئے موثر ایکشن لینے کی بھی ہدایت کی۔
وفاقی وزیرداخلہ محسن نقوی نے نادرا آپریشنل روم کا بھی دورہ کیا۔وفاقی وزیرداخلہ کو پاکستان بھر کے نادرا سنٹرز کی ڈیجیٹل مانیٹرنگ کے نظام کے بارے بریفنگ دی گئی۔وفاقی وزیرداخلہ نے چئیرمین نادرا لیفٹیننٹ جنرل محمد منیر افسر اور ان کی ٹیم کی کاوشوں کو سراہا۔
وفاقی سیکرٹری داخلہ خرم آغا اور نادرا کے اعلیٰ حکام بھی اس موقع پر موجود تھے۔
