ساہیوال، 17 مئی (اے پی پی): کمشنر ساہیوال ڈویژن شعیب اقبال سید نے کہا ہے کہ پنجاب حکومت سموگ کے خاتمے کے لئے کسانوں کے شانہ بشانہ کھڑی ہے اور اس دیرینہ مسئلہ پر قابو پانے کے لئے انہیں جدید آلات سبسڈی پر فراہم کئے جا رہے ہیں۔ انہوں نے کہا کہ دھان کی فصل کی باقیات کو جلانے کی بجائے تلف کرنے کے لئے مشینری کی خریداری کے لئے وزیر اعلیٰ پنجاب مریم نواز نے ضلع ساہیوال کے لئے32کروڑ روپے کی خطیر رقم مختص کی ہے۔
ان خیالات کا اظہار انہوں نے ضلع کونسل ہال میں محکمہ زراعت کی جانب سے کاشتکاروں کو رعایتی نرخوں پر شریڈرز کی فراہمی کے لئے ہونے والی قرعہ اندازی کی تقریب سے خطاب کرتے ہوئے کیا۔ کمشنر شعیب اقبا ل سید نے کہاکہ حکومت پنجاب انسداد سموگ پروگرام کے تحت سپر سیڈر/پاک سیڈر اور رائس سٹرا شریڈر پر60فی صد سبسڈی فراہم کر رہی ہے تاکہ جدید مشینری کے استعمال سے دھان کی باقیات کو زمین میں ملایا جا سکے اور ماحول کو سموگ سے بچایا جا سکے۔ انہوں نے کہا کہ دھان کی باقیات کو زمین میں ملانے سے نہ صرف سموگ میں کمی واقع ہوگی بلکہ صحت پر بھی مثبت اثرات مرتب ہوں گے۔ انہوں نے محکمہ زراعت پر زور دیا کہ کسانوں کو جدید مشینری کے استعمال بارے زیادہ سے زیادہ آگہی فراہم کریں اور انہیں بتائیں کہ کس طرح ان کی معاشرتی اور معاشی حالت میں بہتری لائی جا سکتی ہے۔ قرعہ اندازی کے دوران 89رائس اسٹرا شریڈرز اور 212سپر سیڈ کے لئے خوش نصیبوں کے نام نکالے گئے۔ کمشنر شعیب اقبال سید نے قرعہ اندازی میں نام نکلنے والے خوش نصیبوں کو مبارک باد دی اور ہدایت کی کہ ماحول کو صاف ستھرا بنانے کے لئے مشینری کا زیادہ سے زیادہ استعمال یقینی بنائیں۔ قبل ازیں ڈائریکٹر زراعت چوہدری شہباز اختر نے بتایا کہ ضلع ساہیوال میں کسانوں نے 159 سپر سیڈرز اور 89 رائس سڑا شریڈرز کے لئے بالترتیب 371 اور 150 درخواستیں جمع کروائیں جن میں سے سیکروٹنی کے بعد212 اور 90 امیدواروں کے درمیان قرعہ اندازی کی جا رہی ہے۔ بعد ازاں کمشنر شعیب اقبال سید نے ایک دوخواست گزار کا نام نکال کر قرعہ اندازی کا افتتاح کیا۔
