اسلام آباد،20 مئی (اے پی پی): وفاقی وزیر امور کشمیر و گلگت بلتستان و سیفران انجینئر امیر مقام نے وزیراعظم شہبازشریف کی خصوصی ہدایت پر اسلام آباد ائیرپورٹ پر بیشکک کرغیزستان سے خصوصی طیارے سے علی الصبح پہنچنے والے طلبا کا استقبال کیا۔
وفاقی وزیر انجینئر امیر مقام نے اسلام آبادائیرپورٹ پر طلبہ کا استقبال کرتے ہوئے کہا کہ میں آپ سب کو اپنی طرف سے اور حکومت اور پوری قوم کی طرف سے خوش آمدید کہتا ہوں۔ وزیراعظم نے اس واقعہ کے فوری بعد پاکستانی طلبہ کے تحفظ کے لئے تیزی سے اقدامات کئے۔افسوسناک واقعہ کے فوراً بعد وزیراعظم خود صورتحال کی نگرانی کر رہے تھے۔
وفاقی وزیر انجینئرامیرمقام نے طلبہ کے تاثرات جانے اور ان کی خیریت دریافت کی،وطن آمد پر ان کو خوش آمدید کہا۔
انجینئرامیرمقام نے یقین دہانی کرائی کہ جو بھی آنا چاہے حکومت پاکستان ان کو ہرقسم کی تعاون فراہم کرے گی اورمزید پروازوں کے ذریعے طلبہ وطن واپس لائیں گے۔ پاکستانیوں کی جان و مال کا تحفظ ہر صورت یقینی بنائیں گے۔ ہماری اولین ترجیح پاکستانی طلبہ کی حفاظت ہے۔
وفاقی وزیر انجینئر امیر مقام نے طلبا سے بشکیک میں پیش آنے والے افسوسناک واقعہ کے بارے معلومات لیں اور مسائل پوچھے۔
