اسلام آباد،22 مئی(اے پی پی):وفاقی وزیر داخلہ محسن نقوی نے کیپٹل ہسپتال کا تفصیلی دورہ کیا اور ہسپتال میں علاج معالجےکی سہولتوں کا جائزہ لیا۔وفاقی وزیرداخلہ محسن نقوی نے کیپٹل ہسپتال کے ایمرجنسی بلاک اور لیب کو اپ گریڈ کرنے کااعلان کیااور اس حوالے سے چئیرمین سی ڈی اے و چیف کمشنر اسلام آباد سے ماسٹر پلان بھی طلب کر لیا۔انہوں نے کہا کہ کیپٹل ہسپتال میں آپریشن تھیٹرز سمیت علاج معالجے کی سہولتوں کو بہتر بنایا جائے گا ۔
وفاقی وزیرداخلہ محسن نقوی نے ایمرجنسی بلاک اور واررڈ میں زیر علاج مریضوں کی عیادت کی اور علاج معالجے کی سہولتوں کے بارے دریافت کیا۔بیشتر مریضوں کا ہسپتال میں فراہم کردہ سہولتوں پر اطمینان کا اظہار کیا جبکہ بعض مریضوں نے طبی سہولتوں کے فقدان کی شکایات کیں۔وفاقی وزیر نے کینسر کے مرض میں مبتلا مریضہ راحیلہ کی شکایت پر ایگزیکٹو ڈائریکٹر ہسپتال کو علاج متعلق ہدایات دیں۔
وفاقی وزیرداخلہ محسن نقوی نےڈاکٹرز سے ملاقات کی اور ان کے مسائل پوچھے۔انہوں نے مریضوں سے مفت ادویات اور مفت ٹیسٹ کی سہولت کے بارے بھی استفسار کیا۔
وفاقی وزیرداخلہ محسن نقوی نے ڈائیلسز یونٹ، واٹر پلانٹ اور دیگر وارڈز کا معائنہ کیا اور ڈائیلسز کرانے والے مریضوں کا ریکارڈ چیک کیا۔
وفاقی وزیر نے لانڈری روم اور صفائی کی صورتحال کا بھی جائزہ لیا۔
وفاقی وزیرداخلہ محسن نقوی نے ایم آر آئی، سی ٹی سکین، ایکسرے اور انجیو گرافی روم کا بھی معائنہ کیا اور کہا کہ 500 بیڈز پر مشتمل اس ہسپتال کو بہتر بنایا جائے گا۔
وفاقی سیکرٹری داخلہ خرم آغا، چئیرمین سی ڈی اے و چیف کمشنر اسلام آباد محمد علی رندھاوا، ایگزیکٹو ڈائریکٹر کیپٹل ہسپتال بھی اس موقع پر موجود تھے۔
