اسلام آباد،22مئی(اے پی پی): وفاقی وزیر اطلاعات و نشریات، قومی ورثہ و ثقافت عطاءاللہ تارڑ سے اقوام متحدہ کے انتخابی ضروریات کے جائزہ مشن نے بدھ کو یہاں ملاقات کی۔جس میں الیکشن کمیشن آف پاکستان کو یو این ڈی پی الیکشن سپورٹ پروگرام کے ذریعے تکنیکی معاونت کی فراہمی، فیک نیوز، مس انفارمیشن، ڈس انفارمیشن سمیت دیگر اہم امور پر تبادلہ خیال ہوا۔
عطاء تارڑ نے پاکستان میں انتخابی عمل کو مضبوط بنانے کے لئے عالمی اداروں کے تعاون کو سراہتے ہوئے کہا کہ سوشل میڈیا کے عروج نے سیاسی مصروفیات کو نئی شکل دی ہے، موجودہ ڈیجیٹل دور میں جہاں ڈیجیٹل پر مبنی حکمت عملیوں کی راہ ہموار ہو رہی ہے وہاں فیک نیوز، مس انفارمیشن اور ڈس انفارمیشن جیسے چیلنجز بھی پوری دنیا کا مسئلہ ہیں۔
وفاقی وزیر اطلاعات نے کہا کہ الیکشن کمیشن آف پاکستان موجودہ دور کے تقاضوں کے مطابق ڈیجیٹل محاذ پر کام کر رہا ہے۔ انہوں نے اقوام متحدہ کے انتخابی ضروریات کے جائزہ مشن کو اپنے حلقہ انتخاب سے متعلق بھی آگاہ کیا۔
وفاقی وزیر نے کہا کہ انتخابی عمل میں ووٹرز کو آگاہی فراہم کرنا انتہائی ضروری ہے، میرے حلقہ انتخاب میں مسیحی برادری کے 70 ہزار سے زائدلوگ شامل ہیں۔ انہوں نے کہا کہ اپنے حلقہ انتخاب میں ہر شخص کو متحرک کیا اور انہیں ہر شعبے سے متعلق آگاہی فراہم کی۔
اقوام متحدہ کے انتخابی ضروریات کے جائزہ مشن نے حکومت پاکستان کے انتخابی عمل کی ساکھ کو بہتر بنانے کے لئے اقدامات کو سراہا۔
وفد میں پولیٹیکل افیئرز افسران ہیسام منکارا، ادتیہ ادھیکاری، یو این ڈی پی ریجنل ایڈوائزر ناجیاہاشیمی، چیف ٹیکنیکل ایڈوائزر یو این ڈی پی SELP میری کیومنز، پروگرام ایڈوائزر SELP یو این ڈی پی محمد قاسم جنجوعہ شامل تھے۔
