اسلام آباد،22 مئی (اے پی پی): وزیراعظم نے کہا کہ ملک کے بیشتر علاقوں خصوصاً خیبر پختونخوا ، گلگت بلتستان اور آزاد جموں و کشمیر میں بے پناہ قدرتی وسائل ہیں جن سے صحیح طور پر فائدہ اٹھانے کی ضرورت ہے۔
ان خیالات کا اظہار انہوں نے پاکستان میں جیمز اور قیمتی پتھروں کے شعبے کے حوالے سے اہم اجلاس کی صدارت کرتے ہوئے کیا۔وزیراعظم نے کہا کہ قیمتی پتھروں اور ان سے تیار ہونے والی مصنوعات کی بین الاقوامی سرٹیفیکیشنز پر کام کرنے اور عالمی نمائشوں میں پاکستانی نمائندگی یقینی بنانے کی ضرورت ہے۔
وزیراعظم نے ہدایت کی کہ جیمز اور قیمتی پتھروں کے شعبے کو باقاعدہ صنعت کا درجہ دینے کے حوالے سے اقدامات اٹھائے جائیں ۔ انہوں نے مزید ہدایت کی کہ جیمز اور قیمتی پتھروں کے شعبے کے حوالے سے فوری طور پر لائحہ عمل تیار کیا جائے۔ وزیراعظم نے اس حوالے سے ,نجی شعبے سے ضروری مشاورت اور صوبوں کے ساتھ بھی روابط بڑھانے کی ضرورت پر زور دیا ۔
وزیراعظم نے جیمز اینڈ جیولری ڈیولپمنٹ کمپنی کو فی الفور فعال کرنے کی ہدایت کرتے ہوئے قیمتی پتھروں کی صنعت کے فروغ کے لئے ضروری قانون سازی کا عمل شروع کرنے کی بھی تاکید کی۔ انہوں نے ہدایت کی کہ قیمتی پتھروں کی صنعت میں ویلیو ایڈیشن کے حوالے سے تربیتی پروگرام شروع کیے جائیں۔
اجلاس کو پاکستان کے جیم اسٹونز اور قیمتی پتھروں کے شعبے کے حوالے سے تفصیلی بریفنگ دی گئی۔ اجلاس کو بتایا گیا کہ قیمتی پتھروں کے حوالے سے خیبر پختونخوا ، گلگت بلتستان اور آزاد جموں و کشمیر میں میپنگ کی جانے کی ضرورت ہے۔ اجلاس کو آگاہ کیا گیا کہ جیمز اور نایاب پتھروں کے شعبے میں سرمایہ کاری کے حوالے سے حکمت عملی ترتیب دی جارہی ہے ۔
