اسلام آباد ، 23 مئی (اے پی پی): وفاقی وزیر صنعت و پیداوار رانا تنویر حسین سے پاک سوزوکی موٹرز کارپوریشن کے جاپان سے آئے وفد نے جمعرات کو یہاں ملاقات کی۔جاپانی وفد کی قیادت پاک سوزوکی موٹرز کارپوریشن کے عالمی نائب صدر مسٹر کینیچی آیوکاوا کر رہے تھے۔مسٹر کینیچی آیوکاوا نے اس موقع پر کہا کہ پاک سوزوکی موٹرز کارپوریشن کراچی میں بائیو گیس پلانٹ لگانے میں دلچسپی رکھتی ہے، جس پر رانا تنویر حسین نے کہا کہ حکومت پاک سوزوکی موٹرز کے کاروباری آپریشن اور توسیع میں سہولت فراہم کرے گی۔
وفاقی وزیر صنعت و پیداوار رانا تنویر حسین نے کہا کہ پاکستان سے سوزوکی سوئفٹ اور GS-150 موٹر سائیکل کی برآمد کے آغاز پر مبارکباد پیش کرتاہوں، آٹو سیکٹر کو پچھلی تین دہائیوں سے مراعات یافتہ نظام کے ذریعے سہولت فراہم کی گئی ،آٹو سیکٹر کو اب ملک کے لیے برآمدی ریونیو میں نمایاں حصہ ڈالنا چاہیے۔انہوں نے کہا کہ حکومت الیکٹرک گاڑیوں کی مقامی مینوفیکچرنگ کی حوصلہ افزائی کر رہی ہے،43 کمپنیوں کو مقامی مینوفیکچرنگ الیکٹرک وہیکلز کے سرٹیفکیٹ جاری کئے ہیں۔
نائب صدر پاک سوزوکی موٹرز نے اس موقع پر کہا کہ پاک سوزوکی بہت جلد نئی گاڑیاں مارکیٹ میں متعارف کرائے گا۔
سیکرٹری صنعت و پیداوار وسیم اجمل چوہدری نے بھی ملاقات کے موقع پر موجود تھے۔
