اسلام آباد، 23مئی (اے پی پی ): چیئرمین ایف بی آر ملک امجد زبیر ٹوانہ نے کہا ہے کہ مشکل معاشی حالات میں ہمارا کام بہت چیلنجنگ ہے لیکن ہم معاشی خوشحالی کے لئے محصولات کی وصولی بڑھانے کے لئے پرعزم ہیں۔ انہوں نے تمام افسران پر زور دیا کہ وہ اپنے فرائض کی انجام دہی میں دیانت داری اور پیشہ وارانہ مہارت کے اعلیٰ ترین معیار کو برقرار رکھیں۔
جمعرات کے روز ریجنل ٹیکس آفس اسلام آباد کی نئی عمارت کے افتتاح کے موقع پر منعقدہ تقریب سے خطاب کرتے ہوئے چیئرمین ایف بی آر نے کہا کہ آر ٹی او کی یہ نئی سٹیٹ آف دی آرٹ عمارت ایف بی آر کو جدید بنانے، ٹیکس سسٹم کو مزید موثراور شفاف بنانے کے عزم کی عکاسی کرتی ہے۔انہوں نے کہا کہ اس عمارت کا قیام ٹیکس حکام اور شہریوں کے درمیان ٹیکس کمپلائنس اور اعتماد کے کلچر کے فروغ کے لئے ہماری لگن کو ظاہر کرتا ہے۔
چیئرمین ایف بی آر نے کہا کہ یہ نئی عمارت ٹیکس دہندگان کو بہتر سہولیات فراہم کرنے اور ٹیکس وصولی کے عمل کو سہل بنانے کے لئے جدید ٹیکنالوجی سے پوری طرح لیس ہے۔
چیئرمین ایف بی آر نے اس اہم پراجیکٹ کو کامیابی سے مکمل کرنے پر ممبر ایڈمن/ ایچ آر اور چیف پراجیکٹس اوراُن کی ٹیموں کی خدمات کو سراہا۔انہوں نے مسلسل تعاون پر پاک پی ڈبلیو ڈی اور دیگر سٹیک ہولڈرز کا بھی شکریہ ادا کیا۔
اس سے پہلے ممبر ایڈ من/ ایچ آر سعدیہ صدف گیلانی اور چیف کمشنر آر ٹی او عابد محمود نے بھی تقریب سے خطاب کیا۔ اس موقع پر چیف پراجیکٹس شاہد سومرو نے نئی عمارت کی منصوبہ بندی اور ڈئزائننگ پر بریفنگ بھی دی۔
