لاہور۔ 23 مئی (اے پی پی): صوبائی وزراء صحت خواجہ سلمان رفیق اور خواجہ عمران نذیر کی زیر صدارت پنجاب ہیلتھ انشی ایٹو مینجمنٹ کمپنی میں ہیلتھ انشورنس کے ورکنگ گروپ کی سب کمیٹی کا تیسرا اجلاس منعقد ہوا۔
اجلاس میں سیکرٹری صحت پنجاب علی جان خان، سپیشل سیکرٹری ڈویلپمنٹ سید واجد علی شاہ، وائس چانسلر یونیورسٹی آف چائلڈ ہیلتھ سائنسز پروفیسر ڈاکٹر مسعود صادق، سی ای او پنجاب ہیلتھ انشی ایٹو مینجمنٹ کمپنی ڈاکٹر علی رزاق، پروفیسر محمد علی ایاز صادق، پرنسپل سروسز انسٹی ٹیوٹ آف میڈیکل سائنسز پروفیسر زوہرہ خانم، پرنسپل جنرل ہسپتال لاہور پروفیسر سردار الفرید ظفر اور ڈاکٹر زاہد پرویز نے شرکت کی۔
اجلاس میں ویڈیو لنک کانفرنس کے ذریعے وائس چانسلر کنگ ایڈورڈ میڈیکل یونیورسٹی پروفیسر محمود ایاز اور پرنسپل بہاول پور میڈیکل کالج پروفیسر ڈاکٹر صوفیہ فرخ نے شرکت کی۔صوبائی وزراء صحت خواجہ سلمان رفیق اور خواجہ عمران نذیر نے اجلاس کے دوران ہیلتھ انشورنس میں اصلاحات کا جائزہ لیا۔
تمام ماہرین نے اس حوالہ سے قیمتی تجاویز اور آراء سے آگاہ کیا۔صوبائی وزیر صحت خواجہ سلمان رفیق نے اظہار خیال کرتے ہوئے کہا کہ ہیلتھ انشورنس پروگرام کو عوام کیلئے سود مند بنانے کی کوشش کر رہے ہیں۔ ہمیں ہیلتھ انشورنس کے پروگرام میں خرابیوں کو دور کرنا ہے۔ خواجہ سلمان رفیق نے کہا کہ سرکاری ہسپتالوں کی استدکار بڑھانے کی پوری کوشش کر رہے ہیں۔ انھوں نے کہا کہ ہیلتھ انشورنس پروگرام کے فنانشل ماڈل کو بہتر کرنے کی کوشش کر رہے ہیں۔ ہمارے لئے سرکاری ہسپتالوں میں آنے والے مریض سب سے اہم ہیں۔ یونیورسل ہیلتھ انشورنس کے حوالہ سے ایکسپرٹس کی حتمی تجاویز اور آراء وزیر اعلیٰ پنجاب مریم نواز شریف کو پیش کی جائیں گی۔
صوبائی وزیر صحت خواجہ عمران نذیر نے اظہار خیال کرتے ہوئے کہا کہ یونیورسل ہیلتھ انشورنس پروگرام میں ریٹس کو ریوائز کیا جائے گا۔ سرکاری ہسپتالوں میں پرائیویٹ پریکٹس کو پروموٹ کرنا چاہتے ہیں۔ خواجہ عمران نذیر نے کہا کہ آج بیٹھنے کا بنیادی مقصد یونیورسل ہیلتھ انشورنس پروگرام میں بہتری لانا ہے۔
