اسلام آباد ،24 مئی (اے پی پی): پاکستان میں سرمایہ کاری، کاروباری منصوبوں کے امکانات اور دو طرفہ تعاون کے لئے وفاقی وزیر سرمایہ کاری بورڈ،نجکاری و مواصلات عبدالعلیم خان کی سربراہی میں اعلیٰ سطحی وفد جوائنٹ منسٹریل کمیشن کے تحت کویت کا دورہ کرے گا، اس دورے میں کویت کے وزیر اعظم، خارجہ، توانائی اور پٹرولیم کے وزراء سے پاکستانی وفد کی ملاقات متوقع ہے جبکہ کویت کے وزیر تجارت میزبانی کے فرائض سر انجام دیں گے۔
دورہ کویت کے حوالے سے ضروری امور کو حتمی شکل دینے کے لیے ایک اہم مشاورتی اجلاس آج وفاقی وزیر سرمایہ کاری بورڈ،نجکاری و مواصلات کی زیر صدارت منعقد ہوا جس میں سمندر پارافرادی قوت، داخلہ، اکنامک آفئیر ذویژن،تجارت اور مختلف وزارتوں کے اعلیٰ افسران نے بھی دورہ کویت کے حوالے سے ممکنہ تیاریوں پر تفصیلی بریفنگ دی۔
اس موقع پر وفاقی وزیر عبدالعلیم خان کا کہنا تھا کہ کویت کے دورے کے دوران پاکستان سے زیادہ سے زیادہ افرادی قوت کو روزگار کی فراہمی بالخصوص ہیلتھ پروفیشنلز اور سکلڈ لیبر کو مواقع کی فراہمی پر پیش رفت ہوگی، اسی طرح بزنس کمیونٹی کو اعتماد میں لے کر نجی شعبے کے ذریعے پاک کویت تعاون میں اضافہ کریں گے، ڈیری فارمنگ، میٹ پراڈکس، رائس اینڈ دیگر اشیائے خوردونوش کے لئے پاکستان کی ایکسپورٹ کمپنیوں کو آن بورڈ لیں گے تاکہ تیز تر اقدامات کے ذریعے آگے بڑھا جا سکے۔
وفاقی وزیر سرمایہ کاری بورڈ عبدالعلیم خان کا مزید کہنا تھا کہ پاکستان کی طرف سے اس دورہ کویت سے باہمی اشتراک، اقتصادی امور میں بہتری اور سرمایہ کاری کے نئے دور کا آغاز ہوگا جس کے لئے متعلقہ اداروں کو بھرپور ذمہ داری کا مظاہرہ کرتے ہوئے تیاری کے ساتھ شریک ہونا چاہیے۔ انہوں نے کہا کہ پاکستان اور کویت کے مابین اعتماد سازی کے فروغ سے ملکی معاشی حالات پر مثبت اثرات مرتب ہوں گے اور ملک بھر کی صنعتوں کے فروغ اور کاروباری سرگرمیوں میں اضافہ ممکن ہوگا۔
اجلاس کو بتایا گیا کہ کویت میں پاکستان کے سفیر بھی اس دورے کے حوالے سے آن بورڈ ہیں اور انہوں نے کویت حکام سے تمام ضروری انتظامی امور طے کر لیے ہیں۔دورے میں دوران دونوں ممالک کے مابین تجارتی و کاروباری سرگرمیوں کو حتمی شکل دی جائے گی اور ٹریڈرز کامرس کی وزارت کے اشتراک سے دورہ کویت کو زیادہ سے زیادہ مفید بنایا جائے گا۔
