اسلام آباد،25 مئی (اے پی پی):وفاقی وزیر برائے بین الصوبائی رابطہ رانا ثناءاللہ نے کہا ہے کہ وزیر اعظم کی سربراہی میں ملک میں کھیلوں کے معیار کو بہتر کرنے کے لیے پر عزم ہیں،ہمارا ہدف، پاکستان میں کھیلوں کو عالمی میعار سے ہم آہنگ کرنا ہے۔
ان خیالات کا اظہار انہوں نے اسکولوں میں کھیلوں کی احیاء بارے جائزہ اجلاس کی صدارت کرتے ہوئے کیا۔وفاقی وزیر رانا ثناءاللہ نے اسکولوں میں سپورٹس انفراسٹرکچر سے متعلق تمام سٹیک ہولڈرز سے ڈیٹا طلب کر لیا۔انہوں نے کہا کہ تمام صوبے ، آزاد کشمیر اور گلگت بلتستان سپورٹس بورڈ کے ساتھ ملکر سکول سپورٹس ڈیٹا مرتب کریں، ڈیٹا آنے کے بعد اہداف کو متعین کرنا اور ان کا حصول آسان ہو گا۔
وفاقی وزیر رانا ثنا اللہ نے کہا کہ اس وقت ملک بھر میں سکول لیول پر سپورٹس کو بہتر کرنے کی ضرورت ہے،سپورٹس کو عالمی میعار تک لے جانے کے لیے گراس روٹ لیول تک جانا ہو گا۔انہوں نے ہدایت کی کہ اسکولوں میں سپورٹس کی حالت جانچنے کے لیے ایک میعار مقرر کیا جائے۔
وفاقی سیکرٹری برائے بین الصوبائی رابطہ ندیم ارشاد کیانی، وفاقی سیکرٹری برائے تعلیم محی الدین وانی سمیت تمام صوبوں ، آزاد کشمیر اور گلگت بلتستان کے سپورٹس اور تعلیم کے محکموں کے اعلٰی حکام نے اجلاس میں شرکت کی۔
