لاہور، 25 مئی(اے پی پی): صوبائی وزیر صنعت و تجارت چوہدری شافع حسین سے ایکو(AIKO) سولر کمپنی آف چائنا کے وفد نے ملاقات کی۔پنجاب سرمایہ کاری بورڈ کے کمیٹی روم میں ہونے والی ملاقات میں پنجاب میں سولر پینلز مینوفیکچرنگ پلانٹ لگانے پر بات چیت کی گئی۔چینی کمپنی کے حکام وڈیو لنک کے ذریعے ملاقات میں شریک ہوئے.چوہدری شافع حسین نے کہا کہ پنجاب میں سولر انرجی سیکٹر میں سرمایہ کاری کے وسیع مواقع موجود ہیں، چاہتے ہیں کہ پنجاب میں سولر مینو فیکچرنگ کے پلانٹ لگیں.انھوں نے کہا کہ چینی کمپنی سولر انرجی سیکٹر میں سرمایہ کاری کرے، ہرممکن سہولت دیں گے۔ چین، یوکے سمیت 10سے زائد غیرملکی سولر کمپنیوں سے ملاقات کرچکا ہوں
غیر ملکی سولر کمپنیوں نے پنجاب میں سرمایہ کاری میں دلچسپی کا اظہار کیا ہے.صوبائی وزیر نے کہا کہ سولر انرجی کے فروغ کیلئے طویل المدت پالیسی بنائی جائے گی۔ پنجاب میں اس وقت سولر انرجی میں سرمایہ کاری کا بہترین وقت ہے.انھوں نے کہا کہ حکومت ہاؤسنگ اور انڈسٹری کو سولر پر منتقل کرنے جارہی ہے۔ حکومت مقامی سطح پر سولر پینلز کی مینو فیکچرنگ میں سنجیدہ ہے.چوہدری شافع حسین نے کہا کہ چین کی ایکو سولر کمپنی سرمایہ کاری کے مواقع سے فائدہ اٹھائے، چینی کمپنی کے حکام نے صوبائی وزیر کو کمپنی اور اس کے پراجیکٹس بارے بریفنگ دی۔
چئیرمین پیڈمک جاوید اقبال، سی ای او پنجاب سرمایہ کاری بورڈ جلال حسن اور دیگر بھی ملاقات میں موجود تھے۔
