اسلام آباد،25 مئی(اے پی پی):وزیراعظم کی ہدایت پر چینی و غیر ملکی شہریوں کی فول پروف سکیورٹی کو یقینی بنانے کیلئے داسو – چلاس میں سیف سٹی پراجیکٹ لگانے کا فیصلہ کیا گیا ہے، اس حوالے سے وفاقی وزیرداخلہ محسن نقوی نے جامع پلان طلب کرلیا ہے۔
وزیر داخلہ محسن نقوی کی زیر صدارت داسو ۔چلاس سیف سٹی پراجیکٹ کے قیام کا جائزہ لینے سے متعلق اجلاس ہفتہ کو یہاں منعقد ہوا۔ اس موقع پروزیر داخلہ نے کہا کہ داسو۔ چلاس میں سیف سٹی کا قیام اسلام آباد اور لاہور کی طرح جدید تقاضوں کے مطابق عمل میں لایا جائے گا،سیف سٹی کا مقصد صرف کیمرے لگانا نہیں بلکہ ایسا نظام ہے جو جدید ٹیکنالوجی اور مصنوعی ذہانت کے ٹولز سے لیس ہو۔انہوں نے کہا کہ سیف سٹی پراجیکٹ سے اس علاقے کی نگرانی اور سیکیورٹی کو یقینی بنایا جا سکے گا۔
وزیر داخلہ نے کہا کہ سلام آباد پولیس اس سلسلے میں ہر قسم کی معاونت فراہم کرے گی جبکہ انہوں نے واپڈا، خیبر پختونخوا پولیس اور اسلام آباد پولیس کو ملکر اس سلسلے میں جامع پلان تیار کرنے کی ہدایت کی۔
وزیر داخلہ نے آئی جی اسلام آباد،آر پی او ہزارہ اور واپڈا کے نمائندہ پر مشتمل کمیٹی بھی تشکیل دی، کمیٹی پندرہ دنوں میں داسو۔ چلاس میں سیف سٹی کے قیام کے حوالے سے تفصیلی اور جامع پلان پیش کرے۔
وزیر داخلہ نے کہا کہ پاکستان کی تعمیر و ترقی کیلئے کام کرنے والے چینی شہریوں کی حفاظت ہماری ذمہ داری ہے،اس ذمہ داری کی ادائیگی میں کوئی کسر اٹھا نہ رکھی جائے گی۔
اجلاس میں وفاقی سیکرٹری داخلہ خرم علی آغا، چیئرمین واپڈا لیفٹیننٹ جنرل (ر) سجاد غنی، چیف کمشنر اسلام آباد محمد علی رندھاوا اور آئی جی اسلام آباد علی ناصر رضوی نے شرکت کی جبکہ ایڈیشنل چیف سیکرٹر ی ہوم، ایڈیشنل آئی جی خیبر پختونخوا اور آر پی او ہزارہ ویڈیو لنک کے ذریعے شریک ہوئے۔
