کراچی،26 مئی(اے پی پی): پہلی پی این ایس سی بین الصوبائی ویمنز سافٹ بال چیمپئن شپ میں شریک ٹیموں کی کٹس کی رونمائی کر دی گئی۔
اس موقع پر منعقدہ تقریب سے خطاب میں اسپیشل اولمپکس پاکستان کی چیئر پرسن رونق لاکھانی کا کہنا تھا پاکستانی خواتین کی صلاحیتیں دیگر شعبوں کے ساتھ ساتھ کھیلوں میں بھی کسی طور کم نہیں ہیں، خواتین کو بااختیار بنا کر ہم کھیل کے میدانوں میں بھی اپنا لوہا منوا سکتے ہیں۔انہوں نے کہا کہ سافٹ بال چیمپئین شپ میں شریک خواتین کھلاڑیوں کے لئے یہ ایک بہترین موقع ہے کہ وہ اپنی صلاحیتوں کا بھر پور اظہار کریں تاکہ انہیں بین الاقوامی سطح پر بھی پاکستان کی نمائندگی کا موقع مل سکے۔
رونق لاکھانی نے کہا کہ میں پی این ایس سی اور کومبیکس اسپورٹس سمیت ایونٹ کے تمام اسپانسرز کا شکریہ ادا کرتی ہوں۔
ایس ایف پی کی پیٹرن فاطمہ لاکھانی نے چیمپئین شپ میں شریک تمام ٹیموں کی کھلاڑیوں کو تلقین کی کہ وہ اپنے اپنے صوبے کی سفیر بن کر اپنے کھیل سے اپنے صوبے کا نام روشن کریں، خواتین کی سافٹ بال چیمپئین شپ کے انعقاد پرسافٹ بال فیڈریشن پاکستان کے صدر آصف عظیم اور ان کی پوری ٹیم قابل مبارکباد ہے۔
فیڈریشن کے صدرآصف عظیم کاکہنا تھا کہ صحت مند کھلاڑی مضبوط پاکستان کا پیغام پورے ملک میں پہنچائیں گے،بین الصوبائی چیمپئن شپ کے کامیاب انعقاد کے لئے پر امید ہیں،تمام صوبوں کے کھلاڑیوں کے اعزاز میں بلدیہ عظمی کراچی اور عیسی لیب کی جانب سے استقبالیہ تقاریب منعقد کی جائیں گی۔
چیئرمین آرگنائزنگ کمیٹی ڈاکٹر فرحان عیسی نے کہا کہ بین الصوبائی ویمنز سافٹ بال چیمپئن شپ کی میزبانی سندھ کے لئے اعزاز کی بات ہے جس کیلئے انتظامات کو حتمی شکل دی جارہی ہے۔
پی این ایس سی کی اسسٹنٹ منیجر ایڈمن عائشہ لینا نے کہا کہ پی این ایس سی مستقبل میں بھی سافٹ بال فیڈریشن پاکستان کے ساتھ تعاون جاری رکھتے ہوئے اس طرز کے ایونٹس کے لئے ساتھ مل کر کام کرے گا۔
تقریب میں چیئر پرسن یاسمین حیدر،نائب صدر تہمینہ آصف ممبرپی او اے سید وسیم ہاشمی اور ودیگر شخصیات بھی موجود تھیں۔
