کوئٹہ، 28 مئی(اے پی پی): وزیر اعلیٰ بلوچستان میر سرفراز بگٹی نے کہا کہ پاک افواج اور قوم نے قومی یکجہتی کے ذریعے ملک کے خلاف ہر طرح کی سازشوں کو ناکام بنایا۔
ان خیالات کا اظہار انہوں نے 13ویں نیشنل ورکشاپ بلوچستان کی اختتامی تقریب سے خطاب کرتے ہوئے کیا۔
انہوں نے کہا کہ پاکستان کے خلاف ہر طرح کی سازشوں کو ناکام بنائیں گے دہشت گردی کی عفریت، مذہبی اور لسانی بنیادوں پر قوم کو تقسیم کرنے کی سازشیں کی گئیں جیسے پاک افواج اور قوم نے قومی یکجہتی کے ذریعے ملک کے خلاف ہر طرح کی سازشوں کو ناکام بنایا۔وزیر اعلیٰ بلوچستان نے کہا کہ نیشنل ورکشاپ بلوچستان کے ذریعے قومی سطح پر بلوچستان کا حقیقی تصور واضح ہوا، ورکشاپ میں شامل تمام صوبوں کے شرکاءکو بلوچستان کے زمینی حقائق سے آگاہی حاصل ہوئی حکومت بلوچستان نوجوانوں کی رہنمائی پر مشتمل سرگرمیوں کی حوصلہ افزائی کرے گی،وزیر اعلیٰ نے کہا کہ صحت مند معاشرے میں انفرادی رائے رکھنا ہر کسی کا جمہوری حق ہے ذاتی رائے کو زمینی حقائق اور سچائی کے پیمانے سے ناپنا ضروری ہے اور کسی بھی مقبول بیانیے کی گہرائی میں تصدیق ضروری ہے۔
انہوں نے کہا کہ عالمی دنیا پیشگی تیاری کے بعد سوشل میڈیا پلیٹ فارم کی جانب گئی،سماجی اقدار میں پختہ شعور کے بغیر سوشل میڈیا نے ہماری قوم کو تقسیم کیا اور غلط بیانیہ کے ذریعے ریاست اور نوجوانوں میں خلیج پیدا کی گئی اور کہا کہ نوجوانوں کے ساتھ ڈائیلاگ کا عمل جاری رکھیں گے،نوجوانوں سے ہر فورم پر دلائل کے ساتھ بات چیت کے لئے تیار ہیں نوجوانوں کو تنہا نہیں چھوڑیں گے، ہر سطح پر ان کی بات سنیں گے۔
وزیراعلیٰ بلوچستان میر سرفراز بگٹی نے13ویں نیشنل ورکشاپ بلوچستان کی اختتامی تقریب کے شرکاءمیں سرٹیفکیٹس تقسیم کئے۔
