اسلام آباد،3 جون( اے پی پی): چئیرمین سینیٹ سید یوسف رضاگیلانی نے کہا کہ عالمی معیار کے کھلاڑی پیدا کرنے کیلئے ہمیں پیشہ ورانہ کوچنگ کی ضرورت ہے۔
ان خیالات کا اظہار انہوں نے پیر کو یہاں ورلڈ فٹبال وفد اور پاکستان فٹبال لیگ (یوکے) کے اعزاز میں پارلیمنٹ ہاؤس میں استقبالیہ تقریب سے خطاب کرتے ہوئے کیا۔ انہوں نے کہا کہ تمام معزز مہمانوں کو پارلیمنٹ ہاوس میں خوش آمدید کہتا ہوں
یوسف رضاگیلانی نے کہا کہ بین الاقوامی فٹبالرز، ماہرین، منیجرز اور منتظمین پر مشتمل وفد کے اعزاز میں استقبالیہ تقریب کا انعقاد میرے لئے باعث مسرت ہے چئیرمین پاکستان فٹبال لیگ (یوکے)، فرحان احمد جنیجو، سی ای او پاکستان فٹبال لیگ (یوکے) احمر کنور اور پی ایف ایل (یوکے) کے دیگر نمائندوں کی یہاں موجودگی خوش آئند ہے۔
انہوں نے کہا کہ ہمیں عالمی معیار کے کھلاڑی پیدا کرنے اور پاکستان کو بین الاقوامی فٹ بال کے نقشے پر لانے کیلئے پیشہ ورانہ کوچنگ کی ضرورت ہے۔مجھے یقین ہے کہ پاکستان میں اس شاندار کھیل کا روشن مستقبل ہے۔
انہوں نے کہا کہ نامور بین الاقوامی فٹبالرز اور پی ایف ایل کے نمائندوں کی یہاں پارلیمنٹ ہاؤس میں موجودگی فٹ بال کیلئے ہمارے مشترکہ جذبے کا مظہر ہے۔فٹبال عام کھیل نہیں بلکہ ایک پل ہے جو سرحدوں، ثقافتوں کو جوڑتا ہے، اور لاکھوں لوگوں کے دلوں کے جذبات سے وابستہ ہے۔
انہوں نے کہا کہ پاکستان میں فٹبال ہے لئے ٹیلنٹ اور جذبے کی کوئی کمی نہیں ہے۔چیئرمین سینیٹ نے کہا کہ پاکستان کی 60فیصد سے زائد ابادی نوجوانوں پر مشتمل ہے جو ملک کا قیمتی اثاثہ ہیں ۔ اگر مواقع میسر کئے جائیں تو ہمارے نوجوان ہر میدان میں اپنا لوہا منوانے کی صلاحیت رکھتے ہیں۔
یوسف رضاگیلانی نے کہا کہ پی ایف ایل (یوکے) پاکستان میں بین الاقوامی فٹ بال کو فروغ دینے میں ایک اہم کردار ادا کر رہا ہے ،پی ایف ایل (یوکے) کی انتظامیہ کو پاکستان میں فٹ بال کو فروغ دینے میں ان کی انتھک کوششوں کو خراج تحسین پیش کرتا ہوں۔
یوسف رضاگیلانی نے کہا کہ ہم مل کر کھیلوں کو فروغ دے کر معاشرے میں مثبت تبدیلی لا سکتے ہیں۔انھوں نے کہ کہ خود فٹبال کے شوقین ہونے کے ناطے، میں آپ کو یقین دلاتا ہوں کہ پاکستان میں فٹبال کی جدید ترین سہولیات کو فروغ دینے اور مقامی ٹیلنٹ کو پروان چڑھانے کیلئے اپنی بھرپور کوشش کروں گا۔
یوسف رضاگیلانی نے کہا کہ آئیے ہم ایک روشن مستقبل بنانے کے لیے مل کر کام کریں، جہاں ہر بچے کو فٹبال کے میدان میں اپنے خوابوں کی تکمیل کا موقع ملے ۔وفد کی قیادت فرحان احمد جونیجو ، چیئرمین پاکستان فٹبال لیگ برطانیہ کر رہے تھے۔
چیئرمین پاکستان فٹبال لیگ برطانیہ فرحان جونیجو نے کہا کہ پاکستان میں بلاشبہ ٹیلینٹ کی کوئی کمی نہیں ،پاکستانی عوام میں کھیلوں کا جذبہ قابل تعریف ہے،پاکستان کی تاریخ کا سب بڑا وفد ، بین الاقوامی فٹبال کے کھلاڑی بھی شامل ہیں۔یہ بہت بڑا اقدام ہے ، دنیا کے دس کلبز پاکستان آئے ہیں ، فٹبال کے کھیل کو فروغ ملے گا ۔ چئیر مین پاکستان فٹبال لیگ برطانیہ دس ٹیمیں لانچ ہونگی ۔ملتان ، پشاور ، لاہور ، اسلام آباد ، کراچی ، سیالکوٹ اور دیگر ٹیموں کا اجرا ہوگا،جسکا مقصد ٹیلنٹ کو سامنے لانا ہے۔
وفد میں فٹبال کے نامور بین الاقوامی کھلاڑی اور ماہرین سمیت فرنیچائیر مالکان شامل تھے ۔مائیکل اووین ، برطانوی فٹبالر برطانوی فٹبالر مائیکل اووین نے چیئرمین سینیٹ سید یوسف رضا گیلانی کا شکریہ ادا کیا ۔
